蘇州市軌道交通11號線與3號線工程貫通運營改造項目
蘇州市軌道交通11號線與3號線工程貫通運營改造項目指个是蘇州軌道交通從2023年8月12號起，對3號線搭仔11號線个信號、車輛、軌道等設施个改造工程。箇項項目目的是拿11號線同3號線連拉一道，實現滬蘇同城化同蘇州市內全域一體化，提升崑山到蘇州市中心个直達效率[1][2]。
背景
交通狀況
11號線是崑山去蘇州市區个軌道交通主動脈，每到休息日腳儕會得碰着進出蘇州个客流高峰，幾乎所有个乘客儕要拉唯亭站調3號線，必過唯亭站兩線發車頻率弗同，會導致交交關關換乘个客流積拉站台高頭[3]。
市域一體化
蘇州个縣級市同市區之間一向相對獨立，經濟上嘸沒絕對个中心，畀人嘲「散裝」。蘇州市委書記曹路寶認為，蘇州要融入長三角一體化，必須要先弄好自家蘇州市里向个一體化[4]。蘇州官方拿3號線同11號線貫通運營作為推動崑山進入市域一體化个只重要措施。
改造前運行狀況
3號線
3號線全線長45.2km，是蘇州城區東西向主幹線，改造前運行等級為Goa2級。配車40列240輛[lower-alpha 1]，列車設計時速80km/h，平均旅速約34.37km/h。全線只跑蘇州新區火車站站到唯亭站箇一隻交路。
11號線
11號線个運行等級是Goa4級。全線長41.2km，配車35列210輛，列車設計時速100km/h，平均旅速約42.79km/h。全線絕大多數辰光只跑唯亭站到花橋站箇一隻交路，早夜有弗同交路个大站快車。
工程實施
3號線改造
因為3號線同11號線个自動化等級弗同，3號線等級較低，故咾要先升級3號線信號系統。2023年8月12號開始，3號線開始實施改造，包括正線車站全自動運行功能改造，場段、控制中心設備改造，車輛適應性改造等[1]。
2023年9月4號到12月22號，為咾配合項目施工，3號線禮拜一到禮拜四（除脫法定節假日腳）提造收車，收車後加開3部蘇州新區火車站站到寶帶路站个小交路列車[5]。
2023年11月14號，設備故障，故咾3號線唯亭方向發生延誤，懷疑同信號改造有關[6]。
2023年12月，3號線完成唯亭站至金厙橋站个改造，預計勒拉2024年底前完成挺下來路段个改造。
唯亭站改造
（2023-10-01）
11號線還勒拉設計个辰光，3號線便造好哉，所以設備差異弗小，唯亭站个設計也主要是換乘模式，僅保留遠期改成貫通運營个條件。車站設計个是平行換乘，3號線同11號線聯絡線一開始只造右線（花橋方向），待遠期（嘸沒具體時間表）再拆脫11號線交叉渡線去造左線（蘇州市區方向）[7]。必過，現在聯絡線左線个建設時間大幅提早。
2023年12月15號23點10分，各專業按照搶修應急預案，開始廿多鐘頭長个聯絡線左線改造。17號01點40分，1104列車做試驗列車從草鞋山站出發，開始2個鐘頭个熱滑實驗。20號，貫通工程通過第三方安全認證，相關初期運營證書也發放好哉[8]。
受改造影響，2023年12月16號到22號，11號線唯亭站到陽澄湖東站臨時停運，停運區間將配備免費公交接駁服務[9]。3號線則維持一開始个運行圖安排。
改造後，11號線下行同聯絡線平交个正線部分、D0102-D0103間（西北-東南）渡線搭相關信號設備拆脫，3號線端頭个信號設備更新，11號線站台弗用。
車輛升級
車子勒拉自家个停車場、車輛段進行信號升級。
調度指揮權移交
2023年12月18號04:16開始，3號線調度指揮權從運營一分公司調度中心（廣濟南路指揮控制中心）移交到運營二分公司調度中心（祖沖之路指揮控制中心）手裡向。3號線滸墅關車輛段、唯亭停車場个調度指揮權同屬地管理權從廣濟南路OCC交畀祖沖之路OCC[8]。
改造後運營方案
因為剛貫通个辰光好用个列車弗夠，而且可能會受到3號線信號改造个進度个影響，故咾貫通運營會得分成兩個階段實施。
第一階段
2023年12月23號，11號線與3號線貫通工程第一階段完成，兩線運行交路調整成下頭个樣子：
實際運營中，11號線列車勒拉3號線區段運營个辰光會得降級採用Goa3標準，需要司機勒拉車子浪值守。
- 上行列車停到草鞋山站个辰光，3號線司機上車，打開軟隔斷同司控台蓋板，並勒拉司機室里向值守；列車開到金厙橋站前，司機要提早收好椅凳，到站後拿司控台蓋板同軟隔斷關脫。
- 下行列車從金厙橋站發車前，司機要打開軟隔斷同司控台蓋板；下行列車停靠唯亭站後，司機好關脫司控台，拿司機室重新開放，列車信號升級以Goa4標準繼續運行，司機好勒拉草鞋山站下車。
第二階段
2024年4月27號開始，第二階段貫通運營開始。
因為3號線新車交付進度，而且列車調試个辰光發現各種問題，故咾第二階段嘸沒辦法全線貫通。11號線向西擴展到橫山站，共線範圍擴大。共線段最小行車間隔維持約莫3分30秒，3號線、11號線其它區段約莫7分鐘。大站快車開行計劃保持弗變。[10]
3號線新車勒拉4月27號正式投入11號線花橋至橫山交路運營。所有列車勒拉3號線區段里向儕有人值守。每天早高峰前夜高峰後，有部分列車因調度需求跑3-11號線全線貫通交路。早間列車從滸墅關車輛段出庫，進蘇州新區火車站載客去花橋；夜到列車從花橋趕到蘇州新區火車站，清客以後退出運營返回滸墅關車輛段。只弗過蘇州軌道交通官方微信、微博並沒透露箇隻交路。
第三階段
預計2024年底，11號線好直接開進3號線里向直接到蘇州新區火車站，3號線个列車也將好直接開去崑山，也就是雙向貫通運營[11]。
參見
注釋
參考資料
- ↑ 1.0 1.1 中國工程報 (2023-12-18). "蘇州3號線、11號線貫通改造施工正式開始！公交免費接駁".
- ↑ 城蘇州新聞中心 (2023-12-09). "從東方之門到東方明珠 地鐵11號線、3號線年底單向貫通運營".
- ↑ 寒山寒 (2023-07-06). 蘇州地鐵11號線客流飆升 冷清的唯亭站爆滿 大量崑山客流湧進蘇州.
- ↑ 任俊錳 (2022-08-26). 蘇州嫌自己不夠大. 上觀新聞.
- ↑ 蘇州軌道交通9月4日起 3號線周一至周四提前結束運營 (2023-08-30).
- ↑ 3號線開往唯亭方向的列車將有延誤. 蘇州軌道交通szrailtransit (2023-11-14).
- ↑ 武超超; 董立冬. 蘇州軌道交通S1線唯亭站銜接方案研究. 工程建設與設計. 2022, (20).
- ↑ 8.0 8.1 蘇州軌道交通官方微信視頻號 (2023-12-18). 3-11貫通運營改造全紀實.
- ↑ "從東方之門到東方明珠 地鐵11號線、3號線年底單向貫通運營". 引力播移動端. 2023-12-09. Retrieved 2023-12-09.
- ↑ 蘇州軌道交通 (2024-04-25). "4月27日起，3/11號線貫通到橫山站啦！". Retrieved 2024-04-25.
- ↑ 姑蘇晚報 (2023-12-09). "蘇州地鐵11號線3號線年底單向貫通運營".