У Мінску працягвае работу ХХVI Мінская міжнародная кніжная выстава-кірмаш. І, хоць яе слоган сёлета гучыць як “Больш чым кнігі”, усё-такі менавіта яны, нашы папяровыя мудрыя сябры, застаюцца, як і мінулыя гады, у цэнтры ўвагі ўдзельнікаў і наведвальнікаў беларускага кніжнага форуму. На палях ХХVI ММКВК ужо адбылася прэзентацыя многіх знакавых выданняў, у прыватнасці, 1-га тома 5-томнай “Гісторыі беларускай дзяржаўнасці” Выдавецкага дома “Беларуская навука”, Вялікага гістарычнага атласа Беларусі РВУ “Белкартаграфія”, кніг “Беларускі крымінальны вышук” і “У засені замкаў і палацаў” выдавецтва “Беларусь”, кніг серыі “Сто вершаў” выдавецтва “Мастацкая літаратура” і інш. Адной з самых яркіх і шматлюдных стала 7 лютага прэзентацыя кнігі “У рытме імклівых гадоў… Нарысы гісторыі камсамола Беларусі”, якая пабачыла свет у 2018 годзе ў Выдавецкім доме “Звязда”.
Гэтае выданне, несумненна, можна назваць унікальным: прывітальныя словы Прэзідэнта Рэспублікі Беларусь Аляксандра Лукашэнкі і міністра адукацыі Рэспублікі Беларусь старшыні Рэспубліканскага аргкамітэта па святкаванні 100-годдзя камсамола Ігара Карпенкі, прадстаўнічы склад аўтараў, большасць з якіх мае вопыт работы і ў камсамоле, і ў БРСМ, найцікавейшыя малавядомыя факты з архіваў Беларусі і Расіі, больш як 300 рэдкіх архіўных фотаздымкаў і фотакопій дакументаў, успаміны камсамольскіх лідараў мінулых дзесяцігоддзяў — сапраўдны падарунак да 100-годдзя камсамола ўсім пакаленням камсамольцаў, а таксама сённяшнім маладым беларусам з актыўнай грамадзянскай пазіцыяй.
Як адзначыў на прэзентацыі рэдактар-складальнік і адзін з аўтараў выдання, дэкан факультэта філасофіі і сацыяльных навук БДУ, вядомы гісторык і палітолаг Вадзім Гігін, такога даследавання, дзе была б так падрабязна прааналізавана гісторыя камсамола Беларусі з моманту яго нараджэння, не выходзіла ўжо 40 гадоў. Але гэта толькі пачатак вялікай даследчай працы. Плануецца, што ў 2020 годзе, калі будзе адзначацца 100-годдзе непасрэдна беларускага камсамола, выйдзе новая, значна дапоўненая звесткамі, дакументамі і навуковымі высновамі кніга аб гісторыі і сучаснасці маладёжнага руху ў Беларусі.
На прэзентацыі кнігі “У рытме імклівых гадоў… Нарысы гісторыі камсамола Беларусі” таксама выступілі старшыня Савета ветэранаў камсамола, піянерскага і мала-дзёжнага руху (у 1990—1991 гадах — першы сакратар ЦК ЛКСМБ) Аляксей Крыўдэнка, вядомы ў мінулым дзяржаўны і партыйны дзеяч (у 1990—1991 гадах — другі сакратар ЦК Кампартыі Беларусі) Аляксей Камай, сацыёлаг член-карэспандэнт Нацыянальнай акадэміі навук Беларусі Аляксандр Данілаў, адзін з лідараў маладзёжнага руху Беларусі ў постсавецкі час (у 2008—2010 гадах — першы сакратар БРСМ) Юрый Крывадубскі і інш. У прыватнасці, Аляксей Крыўдэнка, ён жа адзін з аўтараў кнігі, адзначыў: “Як вядома, гісторыя нікога ніколі не вучыла, але за яе няведанне яна вельмі сурова карае. Таму, калі мы працавалі над гэтай кнігай, хацелі паказаць менавіта маладому пакаленню, што ў нас была слаўная гісторыя, гісторыя, якой можна ганарыцца, гісторыя, у якой было вельмі многа сваіх герояў”.
Наведвальнікі ХХVI ММКВК, якія завіталі на прэзентацыю кнігі “У рытме імклівых гадоў…”, мелі магчымасць адказаць на пытанні спецыяльнай анкеты з дастаткова складанымі пытаннямі, напрыклад, “Колькі дзён нараджэння ў беларускага камсамола?”, “Колькі ордэнаў мае камсамол Беларусі?”, “Як звалі першага лідара камсамольскага руху ў Беларусі?”, “Якое дачыненне мае да гісторыі беларускага камсамола бацька Максіма Багдановіча Адам Ягоравіч Багдановіч?”. Аўтары правільных адказаў атрымалі ў падарунак прэзентаванае выданне.
Мікола ЧЭМЕР.
Фота Алега ІГНАТОВІЧА.
