Wikipedia:GrafCat
Quest articol chì l'è scrivud in lombard, con la Noeuva Ortografia Lombarda |
In su la Wikipedia in lombard se poden doperà domà di grafie rangiade e aprovade de la comunità. In su la Wikipedia a l'è mej doperà vuna di grafie panlombarde, ma se poden doperà anca i altre grafie macro-dialetai o locali.
Se la grafia del to dialet la gh'è no o te gh'hee di dubi, contata la comunità in del Grot!
La classifegazzion per grafia, in gerch GrafCat, la se fa cont un template aposta. Se se indica el dialet (l'è no obligatori, ma propi consiliad), gh'è de fàll in del template e doperà vun di dialet compatibil.
Grafie panlombarde
Grafia NOL
Per savenn pussee, varda l'articol Noeuva Ortografia Lombarda. |
La Noeuva Ortografia Lombarda, breviada NOL, a l'è 'n evoluzzion del modell classegh, doperad in Lombardia del '600 e bandonad de la pupart di dialet, foeura del macro-milanes, per la fin del '800, in favor de 'na grafia italianeggianta, fada inscì de fonzionà ben per tuta la Lombardofonia intrega.
De 'sta grafia gh'è 'n poo de resorse, compagn del:
- Sit ofizzial
- Dizzionari
- La pupart del Wikizzionari lombard
Per una guida a la grafia, podii lensger la vos che gh'è al principi de la sezzion.
Desgià che l'è una grafia panlombarda, a l'è doperabel per tucc i dialet lombard.
Grafia SL
Per savenn pussee, varda l'articol Scriver Lombard. |
La Scriver Lombard', breviada SL, a l'è una grafia polinomega assee unifeganta per el lombard, che la se fonda in sui classegh de la literadura lombarda, compagn di test del Belcalcer, Bonvexin e Uguçon.
Resorse:
- Sit ofizzial
- Dizzionari
- Una bona part del Wikizzionari a l'è scrivuda in SL
- Liber
Per una guida a la grafia, podii lensger la vos che gh'è al principi de la sezzion.
Desgià che l'è una grafia panlombarda, a l'è doperabel per tucc i dialet lombard
Grafie macro-dialetai
Grafia insubrica
Grafia oriental
Grafie locai
Grafia classega milanesa
La grafia classega milanesa a l'è la grafia di omenoni de spallera manzonad del Carlo Porta: nassuda cont el Varon Milanes, a l'è stad el Carlo Maria Maggi a fàlla quell che l'è incoeu.
A bon cunt, 'sta grafia l'è stada doperada a longh per tuta la Lombardofonia ocidental, ma cont el temp el sò ambient a l'è stad limitad al macro-milanes.
Donca, in teoria, a l'è possibel doperà la milanesa per tucc i dialet ocidentai, ma se in la vosta zona a gh'è no 'na tradizzion grafega milanesa ve consiliom de dà 'n oggiada ai grafie panlombarde.
De resorse per la grafia classega milanesa ghe n'è tante: podii doperà i vari dizzionari milanes, de quell del Cherubin a l'Arrighi, de quej del CFM al Beretta. Anca el Wikizionario italian el gh'ha 'n bon repertori de grafia milanesa.
A l'è ben tegnì a ment che "grafia milanesa" a l'è 'n ombrella per varie scerne che gh'hann in comun di fondament e 'na tradizzion. Te sèe liber de catà quella che la te pias pussee, a pat de restà consistent in di articoi. Insoma, ne va ben sia "piscinina" che "piscininna", ma no in del midem articol!
Grafia del Ducat
La Grafia del Ducat a l'è 'na grafia tradizzional del bergamasch, per la pupart fonetega ma con di boni element etimologich, che l'è regolada del Ducat de Piazza Pontida, a Berghem.
A gh'è 'n bell vocabolari fad del Ducat, ma se po doperà, cum grano salis, un quajsevoeur dizzionari bergamasch, compagn de quell del Tiraboschi.
'sta grafia chi la se po doperà domà per el bergamasch.
Grafia LSI
La Grafia LSI a l'è la storega grafia doperada per scriver i dialet de la Lombardia svizzera. A l'è 'na grafia assee fonetega, ma cont un bell toch de element etimologich.
Per savénn pussee, ve consiliom de lensger quella guida chi, poeu, se vorii, podii doperà i varie resorse online relassade del Center de Dialetologia Cantonal o, per i dialet del Grison, el Repertorio.
La grafia LSI a l'è doperabel per tucc i dialet lombard parlad in Isvizzera e anca per el Comasch, indova che l'è tradizzional.
Grafia del Lombard meridional
Per Grafia del Lombard meridional se intend un modell de scritura classegh doperad per i dialet lombard de transizzion con l'Emilian, fondada in sul modell classegh sgeneral ma con di modifeghe per la fonetega particolar.
De solet, i pussee important a inn el dopera de "ou" per la /u/, compagn del franzes, e di voeulte, del doperà de la æ o ä.
'Sto modell l'è, a bon cunt, dree a descomparì, donca l'è consiliad doperà 'n oltra grafia. Impunemanch, l'è possibel doperàll per tucc i dialet lombard con di carateristeghe emilianeggiant, in la nòsta classifegazzion: Paves, Lumellin, Vigevanasch, Olter-padan e Cremones.