Azaya Gbauŋ

Azaya 1

1 † Juda nɛ Jerusalem yɛla da nie pa'al Azaya onɛ da an Amoz biig la ka o nyɛ, saŋkanɛ ka Uzia nɛ Jotam nɛ Ahaz nɛ Hezekia da di Juda teŋ na'am tʋʋnl taaba la.

Zugsɔb la sa'al o nidib la yɛla

2 Azaya da yɛl Zugsɔb la labaar ye,

“Arezana, wʋmma!

Teŋgbauŋɔ, fʋn mɛ kɛlisim!

M ugus biis ka ba duoe na

amaa ka zan'asi m nɔɔr.

3 Na'araug mi' o daan,

ka bʋŋ mɛ mi' o yam daka zin'ig,

amaa Israel dim zi';

man nidib la pʋ mɔr gbin gban'arɛ.”

4 Ya anɛ buudkanɛ an tʋʋmbɛ'ɛd dim,

ka an nimbanɛ tʋʋma pʋ dɔl suorɛ,

ka wiakid tʋʋmbɛ'ɛd,

ka an bibanɛ bɔɔd bugusim,

ka zan'as Zugsɔb la.

Ya nɛ'ɛs Israel dim Wina'am Onɛ An Kasi la,

ka fɛndigi lɛb nya'aŋ ka bid o kudug.

5 Bɔ ka ya lɛm bɔɔd bʋ'ʋd ya'asɛ?

Bɔ ka ya nan kpɛn zan'as ka aandi yita?

Ya zut wʋsa pu'alim nɛ,

ka ya ya'am wʋsa fɛndig.

6 Din yii ya nɔba ni keŋ dʋʋ ya zugin laafi kae,

li anɛ sapu'ad nɛ fɛn'ɛd ma'aa.

Ba pʋ pie li bɛɛ viligi li piennɛ

bɛɛ ba ma' li nɛ kpaam.

7 Nidib widig ya ka basi ya teŋ la.

Bugum dii ya tempʋʋd la.

Saam kena buni ya pɔɔd la ya nini ni,

ka basi ya zaalim nɛ namisʋg.

8 Ba bas Zion tempʋʋg la ka li kpɛlimmi li kɔn',

wʋʋ Fuug Sʋgʋr kanɛ bɛ pɔɔgin,

bɛɛ linɛ zi'e yir sʋʋgin nɛ,

ala ka tempʋʋg la zi'e ka bi'emnam giligi li.

9 Ya'a ka' Zugsɔb Paŋtita'ar Sɔb la kɛ ka ti sieba vʋ'ʋgɛ,

ti teŋ la wʋsa naan nwɛnɛ Sodom teŋ nɛ,

ti naan nwɛnɛ Gomora dim nɛ.

Ba Wina'am pʋ'ʋsʋg pʋ dɔl suorɛ

10 Yanam banɛ an wʋʋ Sodom na'anamaa,

kɛlisimi Zugsɔb la labaar!

Wʋmmi ti Wina'am wada la,

yanam Gomora dima!

11 Zugsɔb la yɛl ye,

“Ya maana banɛ an bɛdegʋ la an bɔɔ tis mam?”

Mam di'esi ya pɛraad nɛ bʋnkɔnbid banɛ nɔb

ka ya mɔri maan nyu'or maana la tig.

Mam pʋ mɔr ya'amlɛog nɛ na'araad nɛ pɛribis nɛ bʋʋs ziim.

12 Yanamɛ ɛɛnti kɛɛn m san'an na la,

anɔ'ɔnɛ yɛti ya ye ya mɔr nɛ'ɛnam na?

Bɔ ka ya giilimi m Pʋ'ʋsim Yir zakin la?

13 Da lɛm mɔri malima linɛ ka' gbin la kennɛ m san'an naa.

M kis maan banɛ ka ya nyu'od la.

Ya nwadpaalig nɛ ya Vʋ'ʋsʋm Daar malima la ka' gbinnɛ;

m yaama yi nɛ ya la'as banɛ an tʋʋmbɛ'ɛd la'asʋg la.

14 Mam kisnɛ ya nwadpaalig malima

nɛ malima banɛ ka ya zi'el la.

Li daamidim nɛ, ka lieb ziidi tisim,

ka m zii li gɛn.

15 Ya ya'a ʋki ya nu'us agɔla ye ya pʋ'ʋs,

m na fɛndigi m nindaa ka basi ya.

Hali ya ya'a sɔs si'el wʋsa m kʋ kɛlisɛ,

ya nu'usi pɛ'ɛl nɛ ziim la zug.

16 Pieminɛ ya mɛŋ ka maali ya mɛŋ nyain.

Mɔri nɛ ya tʋʋmbɛ'ɛd la tɔɔmi m san'an.

Basimi tʋʋmbɛ'ɛd;

17 zamisimi tʋmi linɛ an sʋm,

ka iee zin'ikanɛ ka ba kad saria nɛ sida.

Sʋŋim banɛ ka ba mugusidi ba la,

ka sa'al banɛ wɛbidi ba la.

Sʋŋim banɛ an kpiibis la mɛn,

ka tu'as pʋkɔnya antu'a nɛ yɛlmɛŋir.

18 Zugsɔb la yɛl ye,

“Kemi na ka ti la'asi tɛn'ɛs ka pian' li yɛla.

La'an nɛ ya tʋʋmbɛ'ɛd la miligi mu'oe si'em la,

ya na lɛm pɛligi nwɛnɛ sakuga nɛ,

la'an nɛ lin kɛ ka ya miligi si' la,

ya na lɛm pɛligi nwɛnɛ gungum nɛ.

19 Ya ya'a siaki m nɔɔr sʋ'ʋŋa,

ya na nyɛ disʋma teŋ la nii di.

20 Amaa ya ya'a zan'asim,

ba na kʋʋ ya nɛ sʋ'ʋg zaba ni.”

Zugsɔb la nɔɔri pian' si'em la.

Jerusalem dim tʋbpʋwʋmnim yɛla

21 Gɔsim teŋ sʋŋ la yʋ'ʋn nwɛnɛ pu'agɔɔndir nɛ.

O da anɛ sida nɛ pʋpielim sɔb,

amaa ka yʋ'ʋn lieb ninkʋʋd.

22 Ya anzurifanam la liebnɛ zaalim;

daam kanɛ ka ya nɔŋ la, ba yaligi li nɛ ku'om.

23 Ya tuongatib la zan'asi m nɔɔr,

ka ba zuanam an na'ayiis.

Ba wʋsa nɔŋ nɛ nidib la na da' ba,

ka zɔti dɔl nidibi bɔɔd ye ba di'es piini.

Ba pʋ pian'adi sʋŋid kpiibisɛ,

ka mɛ pʋ kɛlisid pʋkɔnya pian'adɛ.

24 Dinzugɔ, Zugsɔb onɛ an Paŋtita'ar Sɔb la,

Paŋ Sɔb onɛ sʋ'oe Israel la, pian' ya nyain ye;

“Alazugɔ, m na nyɛ yɔlisim m dataas san'an

ka yɔɔ m bi'emnam la sam.

25 M na zan'asi ya,

ka siligi ya wʋʋ kpaam nɛ,

ka yis dian'ad linɛ bɛɛ ya san'an la.

26 M na kɛ ka ya sariakatib maligim bɛ nwɛnɛ kʋdimin la,

ka banɛ san'anɛ ya la bɛ wʋʋ pin'ilʋgʋnɛ da an si'em la.

Lin nya'aŋ la ba na buonnɛ ya ye, ‘Pʋpielim Teŋ dim’,

ka ya teŋ yʋ'ʋr na an Tempʋʋg kanɛ an Sida.”

27 Zugsɔb na faaɛn Zion teŋ nɛ sida,

banɛ siak ka lɛb na la na nyɛ faangir pʋpielim.

28 Amaa o na san'am banɛ an tʋʋmbɛ'ɛd dim nɛ banɛ zan'as o la,

ka banɛ pʋ siak o la na bɔdig.

29 Nyan na dii ya,

yanamɛ mɔr ya'amlɛog ye ya pʋ'ʋsid tiis la zug.

Ba na faki ya zut

yanamɛ gaŋ lɔmbɔn'ɔd sieba wɔ'ɔgid la zug.

30 Ya na nwɛnɛ tikanɛ ka li vaand kʋdig ka sʋʋgid nɛ,

ka nwɛnɛ lɔmbɔn'ɔg kanɛ ka' ku'om.

31 Nintitada la na nwɛnɛ sa'ad,

ka bugum na diti ba tʋʋma linɛ an bɛ'ɛd la

ka sɔ' kae na kpiisɛ.