冕服
冕服係古时间代表得至高礼制嗰衣著体系,係皇帝嘚祭拜天地、宗庙、正旦、圣节等礼祀活动里头著嗰衣裳。完套嗰冕服主要含得冕冠、衣裳(上衣、中衣、下裳)、袴、袜、舄、腰带(革带、大带)、蔽膝、佩玉、绶、剑、圭等构件。冕服嗰“形制”依得佢俚嗰款式、色气、大细,拕分成不同等级,形成国家嗰正式典章制度,箇就係“以礼为服制”。[1]
构造组件[编写 | 編寫源代碼]
- 冕冠
- 延
- 旒
- 帽卷
- 玉笄
- 武
- 缨
- 充耳
- 天河带
- 衣裳
- 交领右衽
- 袖
- 袂
- 大带
- 革带
- 蔽膝
- 纹章:日、月、星、山、龙、华虫、宗彝、藻、火、粉米、黼、黻
- 赤舄
朝代 | 衣 | 裳 | 中衣 | 蔽膝 | 袴 | 袜 | 佩玉 | 大带 | 革带 | 剑 | 舄 | 绶 | 圭 |
---|---|---|---|---|---|---|---|---|---|---|---|---|---|
秦 | |||||||||||||
汉 | |||||||||||||
晋 | |||||||||||||
隋 | |||||||||||||
唐 | |||||||||||||
宋 | |||||||||||||
元 | |||||||||||||
明 |
制衣流程[编写 | 編寫源代碼]
冕服係搦玄、𫄸色缯做嗰,祭服嗰做法係染丝起,接得织造缯。九职之嫔府会加工正丝,舞正嗰“素丝”拕摆嘚“典丝”许首。经过巾荒氏嗰练丝,素丝拕搦得染人上色,佢俚一般拣热天嗰时间利用草类染料染色,话係丹秫染液嗰效果上佳。等得冷天,丝拕搦还典丝,内外工接过素丝或彩丝开始织造冕服嗰布匹。质量上乘嗰玄𫄸缯经“典妇功”嗰手,拕搦得缝人,佢俚做正衣裳后再搦还典妇功。末后画缋嗰画工、绣工接手,嘚衣裳上绘制五色嗰十二文章。做正嗰冕服成衣拕弆嘚内府,司服会依得场合决定皇帝著衣嗰规格,佢搦冕服交把女御,由女御奉承天子。
形成演变[编写 | 編寫源代碼]
三代[编写 | 編寫源代碼]
中国嗰衣饰史历史非常长远。《易经》话“黄帝尧舜,垂衣裳而天下治,盖取诸乾坤。”“黄帝始去皮衣,为上衣以象天,为下裳以象地。”箇下寻到嗰实物也证明许时间嗰华夏人具备做衣嗰能力,好似河南荥阳寻到哩5500年前嗰麻布同得淡绛色罗、纱、纨等带色带花嗰实物。等得夏禹,《论语》话佢“恶衣服,而致美乎黻冕”,即大禹不计算自简嗰衣裳而著重公家嗰服制。商朝係有确切文字记载嗰朝代。《尚书》话“伊尹以冕服奉嗣王归于亳”,等同证明冕服嗰确实存在。甲骨文里头也拕发现有“冕”字,係殷王嗰自称。[2]
周朝係冕服正式确立嗰时代,后世话“尊古礼”都係意图去还周朝嗰典章制度。《周礼·司服》搦冕服分做六款(大裘冕、衮冕、鷩冕、毳冕、𫄨冕、玄冕),故係叫“六冕”。著得正冕服嗰有天子、公、侯、伯、子、男、孤、卿、大夫。各级人员嘚重大祭祀场合,好似祭拜先王、宗庙嗰时间,得著自简所属级别嗰最高级别嗰冕服。
冕服嗰等级 | 人员嗰等级 | 冕服嗰章数 | 衣嗰文章 | 裳嗰文章 |
---|---|---|---|---|
大裘冕 | 王 | 十二章 | 日、月、星辰、山、龙、华虫 | 藻、火、粉米、宗彝、黼、黻 |
衮冕 | 公 | 九章 | 龙、山、华虫、火、宗彝 | 藻、粉米、黼、黻 |
鷩冕 | 伯、侯 | 七章 | 华虫、火、宗彝 | 藻、粉米、黼、黻 |
毳冕 | 子、男 | 五章 | 宗彝、藻、粉米 | 黼、黻 |
𫄨冕 | 孤 | 三章 | 粉米 | 黼、黻 |
玄冕 | 卿、大夫 | 一章 | 黻 |
秦汉[编写 | 編寫源代碼]
“自秦灭弃礼法,先王之制靡敝不存,汉初犹服袀玄以从大祀。历代虽渐复古,终亦不纯也。”[3]周朝嗰礼制经过春秋战国嗰礼崩乐坏、秦朝嗰尊法抑儒,几乎冇盈几多哩。秦始皇废吥六冕之制,光著玄衣绀裳,“一具而已”。[4]玄色係緅色、缁色之间通过六染得到嗰赤黑色,绀色係带麻麻子红嗰乌色,佢俚象征得天,係古人最推崇嗰色气。
汉朝建立后,复古思想回潮。高祖刘邦即位后冇下子就颁布《天子所服第八》,“令群臣议天子所服,以安治天下”。[5]贾谊也话“奇服文章,以等上下而差贵贱”。公元59年,汉明帝确立汉朝全面嗰冕冠制度。“天子、三公、九卿、特进侯、侍祠侯,祀天地明堂,皆冠旒冕,衣裳玄上𫄸下。乘舆备文,日月星辰十二章,三公、诸侯用山龙九章,九卿以下用华虫七章,皆备五采,大佩,赤舄絇履,以承大祭。”[6]即箇时间嗰完套冕服含得冕冠、玄衣𫄸裳、赤舄绚履、佩玉、佩刀佩双印、绶等内容。
唐宋[编写 | 編寫源代碼]
唐朝恢复过周朝嗰六冕制度,皇帝嗰服制规格甚至拕舞得更繁复,《旧唐书》记载“天子衣服,有大裘之冕、衮冕、鷩冕、毳冕、绣冕、玄冕、通天冠、武弁、黑介帻、白纱帽、平巾帻、白帢,凡十二等。”《新唐书》哈添至十四等。[7]至于礼冠方面,唐朝皇帝一了哩戴通天冠,大祭司嗰时间才戴冕冠。
经过五代嗰乱世,宋朝力图复还正统礼制,规定“大裘冕无旒,广八寸,长一尺六寸,前圜后方,前低寸二分,玄表朱里,以缯为之。玉笄以朱组为纮,玉瑱以玄𬘘垂之。为裘以黑羔皮,领袖以黑缯,𫄸裳朱纮而无章饰。佩白玉,玄组绶。革带,博二寸,玉钩,以佩纮属之。素带,朱里,绛纯其外,上朱下绿。白纱中单,皂领,青褾、襈、裾。朱袜,赤舄,黑絇、𫄷、纯。”[8]末后冕服变得更假华丽,“王洙奏:‘天子法服,冕旒形度重大,华饰稍繁,愿集礼官参定。’诏礼院详典礼上闻,而礼院绘图以进。因敕御药院更造,其后,冕服稍增侈如故。”宋朝对冕服嗰争论故係有时间得持续几十年不断。
元明清[编写 | 編寫源代碼]
蒙元以来,皇室一头推行汉法,一头维持蒙古作风,“随时损益,兼存国制”。[9]冕服拕限定为皇室专用,含得冕冠十二旒、青罗衮龙服、绯罗裳、白纱中单、绯罗蔽膝、玉佩、大带、绶、袜、履、靴、真圭等内容。元朝起,冕服开始使用一种叫“纳石失”(nasij)嗰技法,即“织金锦”。
1368年,明太祖朱元璋觉得五冕制度复杂伤哩,光拣出衮冕做为各类祭祀活动嗰正服。但明朝嗰冕服嗰上衣要莽过早以嗰规格,佢甚至遮得下裳,故係“今衣八章,裳四章,故衣常掩裳”。完套冕服嗰定制係:
- 衣、玄色。凡织六章。曰月在肩。各径五寸。星山在后。龙、华虫在两袖。长不掩裳之六章。
- 裳、黄色。为幅七。前三幅。后四幅。连属如帷。凡绣六章。分作四行。火、宗彝、藻、为二行。米、黼、黻、为二行。
- 中单、素纱为之。青缘领、织黻文十二蔽膝、随裳色、罗为之。上绣龙一、下绣火三、系于革带。
- 大带、素表朱里。上缘以朱。下以绿。不用锦。
- 革带、前用玉、其后无玉、以佩绶系而掩之。
- 圭、白玉为之。长尺二寸。剡其上。下以黄绮约之。上刻山形四。盛以黄绮囊。藉以黄锦。
清朝係中国历史里头唯一一只彻底废弃冕服制度嗰朝代。有人劝乾隆著汉衫,乾隆反得话:“我朝满洲先正之遗风,自当永远遵循”,下谕“衣冠必不可轻言改易,所愿变叶子孙,深维根本之计,毋为流言所惑,永永恪遵朕训,庶几不为获罪祖宗之认。”不过,乾隆“取其文,不必取其式”,接受哩冕服制度嗰十二章形式。北京故宫哈留得顺治皇帝嗰十二章龙袍。[10]
中华帝国[编写 | 編寫源代碼]
1915年12月12日,袁世凯建立中华帝国,恢复帝制。佢登基时间穿著嗰祭冠、祭服时常拕话係冕服制度嗰再生。但佢嗰衣裳实际係爵弁同得冕服嗰混合体,衣裳嗰用色、文章才係冕服嗰继续。
等级差异[编写 | 編寫源代碼]
冕服会依得不同嗰场合有不共样嗰等级差异,主要体现嘚冕冠上“旒”数量、长度,衣裳上嗰“章纹”嗰种类、只数等内容。箇就搦冕服分做六级:
- 大裘冕:王祀昊天上帝所用,配十二旒冕冠,大裘、玄衣𫄸裳。上衣绘日、月、星辰、山、龙、华虫六章纹,下裳绣藻、火、粉米、宗彝、黼、黻六章纹,统共十二章,故係叫“十二章服”。
- 衮冕:王之吉服,配九旒冕冠,玄衣𫄸裳,衣绘龙、山、华虫、火、宗彝五章纹,裳绣藻、粉米、黼、黻四章纹,统共九章。
- 鷩冕:王祭先公、飨射所用,配七旒冕冠、玄衣𫄸裳,衣绘华虫、火、宗彝三章纹,裳绣藻、粉米、黼、黻四章纹,统共七章。
- 毳冕:王祀四望山川所用,配五旒冕冠、玄衣𫄸裳,衣绘宗彝、藻、粉米三章纹,裳绣黼、黻二章纹,统共五章。
- 𫄨冕:王祭社稷、先王所用,配四旒冕冠、玄衣𫄸裳,衣绣粉米一章纹,裳绣黼、黻二章纹。
- 玄冕:王祭群小即祀林泽坟衍四方百物时所用,配三旒冕冠、玄衣𫄸裳,衣无章纹,裳绣黻一章纹。
《周礼·春官·司服》话明不同等级嗰用处:“王之吉服:祀昊天上帝,则服大裘而冕;祀五帝亦如之;享先王则衮冕;享先公飨射则鷩冕;祀四望山川则毳冕;祭社稷五祀则希冕;祭小祀则玄冕。”不同等级嗰人也有级别嗰限制:“公之服,自衮冕而下如王之服;侯伯之服,自鷩冕而下如公之服;子男之服,自毳冕而下如侯伯之服;孤之服,自希冕而下如子男之服;卿大夫之服,自玄冕而下如孤之服。”
大裘冕[编写 | 編寫源代碼]
大裘冕係六冕制度里头至尊贵嗰衣裳,一般係搦材质上乘嗰黑羊羔皮做嗰。大裘拣乌色,係因为“取其与冕服玄衣相承”;[11]用羔皮,係因为羔羊“跪乳驯顺”、“群而不失其类”。[12]
裘衣又拕分做好几只级别。依得穿著场合、人员身份、衣裳用途做工,裘衣拕分做大裘、良裘、功裘、𫷷裘四款。做为裘衣里头嗰至高等级,大裘光係做为天子祭天嗰时间著嗰祭服。《司裘》话“裘言大者,以其祭天地之服,故以大言之,非谓裘体侈大,则义同于大射也。”古时间诸侯不得祭天,天子不得搦大裘赏赐把诸侯。[13]
《礼记·玉藻》话“服之裘也,充美也”。大裘嗰外首得著裼衣,即“裼,谓裘上又加衣也”。[14]古人觉得文身盈充才克气。有身份嗰人走门嗰时间不得光穿裘衣,故係《玉藻》话“表裘不入公门”。裼衣嗰外首哈有上衣,“与裘同色”,“当以衮龙十二章为袭”。[15]
十二文章[编写 | 編寫源代碼]
《周礼》:“青与赤谓之文,赤与白谓之章。”“文”係不同色气嗰颜色交错嘚一起,“章”係颜色好艳嗰纹样。“文章”拕话嘚一起可以追溯到《左传》嗰“昭文章,明贵贱”,《楚辞》嗰“青黄杂糅,文章烂兮”。冕服上头嗰文章係为得标明阶级之间嗰等差,好似董仲舒话:“是以天下见其服而知贵贱,望其章而知势位”。天子穿戴嗰係十二旒、十二章,“十二”係古人思想里头嗰至大之数。《尚书》就记载舜嗰时间,“予欲观古人之象,日、月、星辰、山、龙、华虫、作会、宗彝、藻、火、粉米、黼、黻、𫄨绣,以五采彰施于五色,作服,汝明。”
十二文章嗰排列分布最早得到《隋书》里头寻到迹,“具依此,于左右髆上为日月各一,当后领下而为星辰,又山、龙九物,各重行十二。”末后历代嗰记载著逐渐丰富,但各自有滴子不同。明朝嗰时间,十二文章嗰排列最终确定完备。1405年,永乐皇帝朱棣规定“玄衣八章,日、月、龙在肩,星辰、山在背,火、华虫、宗彝在袖;𫄸裳四章,织藻、粉米、黼、黻各二。”
文化意蕴[编写 | 編寫源代碼]
冕服制度嗰奠定係华夏人中央集权社会嗰象征。各自利益集团形成差别等级、阶层,承认自简所属嗰价值地位。天子通过箇只等级秩序统治四方,佢嗰服饰搦佢同得别嗰社会人群区分开,係下底人不得僭越嗰规章。冕服係王公贵胄嗰专有服饰,不同等级嗰贵族又拕配以不共样嗰冕服,皇帝也揸得出席场合嗰不同穿著相配嗰冕服。故係《后汉书》话:
国外影响[编写 | 編寫源代碼]
中国嗰皇帝早以会赠与冕服把外藩国王,为得显示係真龙天子,得统帅四方。好似朝鲜古书《高丽史》等史籍里头,记载得1065年到1370年之间,高丽国王、世子获赐好几到辽国嗰冕服。李氏朝鲜嗰时间,朝鲜嗰冕服等级拕明朝确立为国王著九章冕服,即:“上衣青色,装饰五章,龙在两肩,山在背部,火、华虫和宗彜在两袖,此三章每袖自上而下各三;下裳𫄸色,装饰四章,藻、粉米、黼、黻,每章各二”,另有大带、蔽膝、佩、绶等配件;王世子著七章冕服。20世纪初年朝鲜自立称帝,故係改做最高等级嗰十二章冕服。
日本拕唐朝嗰影响至深,早到701年嗰时间,文武天皇就发布大宝律令,规定天皇嘚正式场合得采用十二章冕服嗰“衮龙御衣”。732年,冕服拕正式指定做皇帝至高礼服,佢嗰上衣含得日、月、七星、山、火、龙、华虫八只模样,下裳含得藻、粉米、斧、黻四只模样。
越南嗰阮朝时间,脱离中国影响建立帝国,皇帝嗰礼服体制也跟得改做至高级别嗰冕服。
内文注脚[编写 | 編寫源代碼]
参考书目[编写 | 編寫源代碼]
- 《中国历代帝王冕服研究》,崔圭顺,东华大学出版社,2007年,ISBN 978-7-81111-296-2
- 《冕服服章之研究》,王宇清,国立历史博物馆,1966年