རྟ་མགྲིན་གྱི་སྨོན་ལམ།

༄༅། །སྨོན་ལམ་ཉུང་འདུས་བདེ་ཆེན་བཅུད་ལེན་ཞེས་བྱ་བ་བཞུགས་སོ།།

༄༅། །ན་མོ་བཛྲ་ཀྲོ་དྷ་ཡེ། དུས་གསུམ་རྒྱལ་བ་སྲས་དང་བཅས་རྣམས་ཀྱི། །ཡེ་ཤེས་རོལ་གར་དཔལ་ཆེན་ཧེ་རུ་ཀ། །ཁྲོ་རྒྱལ་རྟ་མཆོག་རོལ་པའི་ཞབས་པད་ལ། །བྱང་ཆུབ་སྙིང་པོའི་བར་དུ་གུས་ཕྱག་འཚལ། །གདོད་ནས་ལྷུན་གྲུབ་རང་རིག་ཡེ་ཤེས་ཆེའི། །རང་བཞིན་མགོན་པོ་ཁྱེད་དང་གཉིས་མེད་པའི། །དག་གསལ་རྣལ་འབྱོར་ལྷ་ཡི་དཀྱིལ་འཁོར་དུ། །བསྙེན་ཅིང་བསྒྲུབ་པས་ཁྱོད་སྐུ་མྱུར་འགྲུབ་ཤོག །དེ་མ་ཐོབ་ཀྱི་ཚེ་རབས་ཀུན་ཏུ་ཡང་། །མི་ཁོམ་བརྒྱད་སྤངས་དལ་བའི་རྟེན་རྙེད་ཅིང་། །བཤེས་གཉེན་དམ་པའི་མགོན་གྱིས་རྗེས་བཟུང་ནས། །ཐེག་ཆེན་ཆོས་ཀྱི་བདུད་རྩིས་འཚོ་བར་ཤོག། །འདོད་ལས་ཕྱིར་ཕྱོགས་ངེས་འབྱུང་ཚུལ་ཁྲིམས་དང་། །བྱམས་བརྩེས་ཀུན་བསླངས་བྱང་ཆུབ་སེམས་མཆོག་ལྡན། །ཕྱིན་དྲུག་བསྡུ་བཞིས་རྒྱལ་སྲས་སེམས་དཔའ་ཆེའི། །རྣམ་ཐར་རྒྱ་མཚོའི་ཕ་རོལ་ཕྱིན་པར་ཤོག། །བསླབ་གསུམ་རྒྱུད་མཛེས་ཐོས་པའི་ཕ་རོལ་སོན། །བསམ་པས་ལེགས་སྦྱངས་སྒོམ་བྱུང་ཕུལ་དུ་ཕྱིན། །ཤེས་རབ་གསུམ་གྱི་སྣང་བས་རྨོངས་པའི་མུན། །མཐའ་དག་དྲུངས་ནས་འབྱིན་པའི་དཔལ་ཐོབ་ཤོག། །སྨིན་བྱེད་དབང་བཞིས་སྒོ་གསུམ་དྲི་མ་བཀྲུས། །གནས་སྐབས་བཞི་སྦྱངས་སྐུ་བཞིའི་ས་བོན་ཐེབས། །བསྐྱེད་རིམ་མཐར་ཕྱིན་སྣོད་བཅུད་ལྷ་སྐུར་རྟོགས། །རྫོགས་རིམ་ཟབ་གསལ་གཉིས་མེད་མཐར་ཕྱིན་ཤོག། །གཏུམ་མོའི་མེས་སྦྱངས་ཕུང་ཁམས་དྷུ་ཏིར་དག། །ཉི་ཟླའི་ལམ་བཅོམ་སྒྲ་གཅན་ངང་དུ་འབབ། །འཛག་བདེའི་རྒྱུན་ཆད་འཕོ་མེད་དབྱིངས་སུ་ཐིམ། །ཟུང་འཇུག་ཆེན་པོའི་གོ་འཕང་མཐར་ཕྱིན་ཤོག། ལྷན་སྐྱེས་བདེ་ཆེན་རོལ་པ་བསམ་ཡས་པས། །མ་དག་ལྟར་སྣང་འགྲོ་བའི་ཁམས་ཀུན་ཏུ། །ནམ་མཁའ་ཇི་སྲིད་ཁྱབ་རྟག་ལྷུན་གྲུབ་པས། །རྣམ་གྲོལ་རྡོ་རྗེའི་ས་ལམ་གསལ་བྱེད་ཤོག། _{།ཅེས་པ་འདི་ཤཱཀ་རིན་པས་སོ།།}