འགྲོ་ཕན་སྨོན་ལམ།

༄༅། །འགྲོ་ཕན་སྨོན་ལམ་བཞུགས་སོ།།

༄༅། །འགྲོ་ལ་ཕན་བདེ་འབྱུང་བའི་གཞི་གཅིག་པུ། །དཔལ་ལྡན་འབྲུག་པའི་བསྟན་པ་རིན་པོ་ཆེ། །ཕྱོགས་དུས་ཀུན་ཏུ་དར་ཞིང་རྒྱས་པ་དང་། །འགྲོ་ཀུན་ཐབས་མཁས་དེ་ཡིས་གྲོལ་གྱུར་ཅིག །ཡུལ་ལྗོངས་སྤྱི་དང་བྱེ་བྲག་འབྲུག་ཡུལ་འདིར། །མི་འཐུན་ཉེར་འཚེའི་མིང་ཡང་མི་གྲགས་ཤིང་། །དཔལ་ལྡན་བླ་མའི་སྐུ་ཚེ་བརྟན་པ་དང་། །དགེ་འདུན་སྡེ་རྣམས་དར་ཞིང་རྒྱས་པར་ཤོག །ས་སྐྱོང་མི་དབང་ཆབ་སྲིད་བརྟན་པ་དང་། །འབངས་རྣམས་བདེ་སྐྱིད་དཔལ་ལ་སྤྱོད་པར་ཤོག །འདི་ཡི་དགེ་བས་བསྟན་པ་རྒྱས་པའི་གེགས། །བདུད་རིགས་རྣམས་དང་དེ་ཡིས་ཡིད་བསྐྱོད་པས། །ལོག་པར་བསྒྲུབ་པ་མཐའ་དག་ཚར་བཅད་ནས། །བསྟན་པའི་རྒྱལ་མཚན་ཕྱོགས་བཅུར་བསྒྲེང་བར་ཤོག །གནས་འདིར་དཔལ་འབྱོར་བྱིན་རླབས་མི་ཉམས་ཤིང་། །བསམ་སྦྱོར་ངན་པའི་གདུག་རྩུབ་ཞི་བ་དང་། །བསླབ་གསུམ་རྣམ་དག་བསྟན་པ་གཅེས་འཛིན་པའི། །དགེ་འདུན་ཚོགས་ཀྱིས་གང་བའི་བཀྲ་ཤིས་ཤོག _{།གསེར་ཁང་སྤྲུལ་སྐུས་མཛད་པའོ།།}