འཁོར་བར་འཁོར་ཚེ་སྨོན་ལམ།

༄༅། །སྨོན་ལམ་འཁོར་བར་འཁོར་ཚེ་མ་བཞུགས་སོ།།

༈ ན་མོ། འཁོར་བར་འཁོར་ཚེ་སྐྱེ་གནས་ཐམས་ཅད་དུ། །ཆོས་ལ་བཟོད་པ་མ་ཐོབ་བར་དུ་ནི། །ངན་སོང་གསུམ་དུ་ནམ་ཡང་མི་སྐྱེ་ཞིང་། །མཐོ་རིས་མི་ཡི་ལུས་སུ་སྐྱེ་བར་ཤོག། །མཐོ་རིས་མི་ཡི་ལུས་སུ་སྐྱེས་ནས་ཀྱང་། །སྡིག་སྤྱོད་རྒྱལ་པོར་མ་སྐྱེ་དེ་ཡི་བློན་པོ་དང་། །དམག་དཔོན་ཞལ་ལྕེ་གཅོད་པའི་ལུས་སུ་མ་སྐྱེ་ཤོག །ཁེ་བྱེད་ཏིལ་རྡུང་ཆང་འཚོང་རྐུན་པོ་དང་། །བྲན་དང་མོ་ཡི་ལུས་སུ་མ་སྐྱེ་ཤོག། །དགེ་སློང་རྣམས་ལ་དབང་བྱེད་བདག་པོ་དང་། །གནས་བརྟན་ལས་བྱེད་པ་དང་ནང་ཁྲིམས་པ། །དགེ་བསྐོས་གཙང་སྦྱོར་བ་དང་དམ་བཞག་པ། །གང་ཟག་ལས་བྱེད་རྣམས་སུ་མ་སྐྱེ་ཤོག། །མཐའ་འཁོབ་ཀླ་ཀློ་སྐྱེ་བོའི་ཡུལ་རྣམས་དང་། །གླེན་ལྐུགས་འོན་ལོང་ཕྲག་དོག་ཅན་རྣམས་དང་། །མུ་སྟེགས་ལོག་ལྟ་ཅན་གྱི་རིགས་རྣམས་དང་། །རིགས་ངན་གཤན་པའི་ལུས་སུ་མ་སྐྱེ་ཤོག །བྱང་ཆུབ་མ་ཐོབ་བར་དུ་རྟག་པར་བདག། །ལུས་ཀྱི་ཡན་ལག་རྒྱས་ཤིང་སྐྱོན་མེད་པ། །དབང་པོ་ཚང་ཞིང་རིགས་མཐོ་བཀུར་བའི་གནས། །དམ་ཆོས་སྤྱོད་པའི་ལུས་སུ་སྐྱེ་བར་ཤོག། །དམ་ཆོས་སྤྱོད་པའི་ལུས་སུ་སྐྱེས་ནས་ཀྱང་། །གཞོན་ནུར་རབ་བྱུང་ཚུལ་ཁྲིམས་ལྡན་པ་དང་། །ཚེ་ལ་ནད་ཀྱི་བར་ཆད་མེད་པ་དང་། །སྐྱེས་མ་ཐག་ཏུ་ཆོས་དང་འཕྲད་པར་ཤོག། །སྐྱེས་མ་ཐག་ཏུ་ཆོས་དང་འཕྲད་ནས་ཀྱང་། །ཐོས་བསམ་སྒོམ་གསུམ་རིགས་པས་རྒྱུད་སྦྱངས་ནས། །རྣམ་ཤེས་དྲུག་པོ་ཡུལ་ལ་མ་ཡེངས་པར། །ཏིང་འཛིན་རྩེ་གཅིག་སེམས་ལ་དབང་ཐོབ་ནས། །ཁམས་གསུམ་སེམས་ཅན་མ་ལུས་ཐམས་ཅད་ཀྱི། །དོན་རྣམས་དཔག་མེད་བདག་གིས་འགྲུབ་པར་ཤོག །འདི་བཟུང་ཚེ་རབས་ཐམས་ཅད་དུ། །མི་ལུས་རིན་ཆེན་ཐོབ་པ་དང་། །གསང་སྔགས་རྡོ་རྗེ་ཐེག་པ་ཡི། །བླ་མ་སངས་རྒྱས་རྣམས་དང་མཇལ་བར་ཤོག _{།ཅེས་པའང་སློབ་དཔོན་ཀླུ་སྒྲུབ་ཀྱིས་མཛད་པའོ།།}