སྨོན་ལམ་ཚོགས་གཉིས་འཕེལ་བྱེད།

༈ སྨོན་ལམ་ཚོགས་གཉིས་འཕེལ་བྱེད་བཞུགས་སོ།།

༄༅། །དཀོན་མཆོག་གསུམ་ལ་ཕྱག་འཚལ་ལོ། །ཐུགས་རྗེའི་བདག་ཉིད་བླ་མ་དང་། །དཀོན་མཆོག་གསུམ་དང་ཡི་དམ་ལྷ། །ལྷ་ཡི་དྲང་སྲོང་སྨོན་ལམ་རྣམས། །ལྷག་པའི་སྨོན་ལམ་འགྲུབ་པར་ཤོག། །མིར་གྱུར་ཡུལ་དབུས་སྐྱེ་བ་དང་། །དབང་པོ་ཚང་ཞིང་གནས་ལ་དད། །དེ་བཞིན་ལས་མཐའ་མ་ལོག་པ། །རང་འབྱོར་ལྔ་དང་ལྡན་པར་ཤོག །སངས་རྒྱས་བྱོན་དང་དེས་ཆོས་གསུངས། །བསྟན་གནས་བསྟན་ཕྱིར་འཇུག་པ་དང་། །གཞན་ཕྱིར་རྟག་ཏུ་སྙིང་རྗེ་བའི། །གཞན་འབྱོར་ལྔ་དང་ལྡན་པར་ཤོག །དམྱལ་བ་ཡི་དྭགས་དུད་འགྲོ་དང་། །ཚེ་རིང་ཀླ་ཀློ་ལོག་ལྟ་དང་། །སངས་རྒྱས་ཀྱིས་སྟོངས་ལྐུགས་པ་སྟེ། །མི་ཁོམ་བརྒྱད་ལས་ཐར་བར་ཤོག །དད་པ་དང་ནི་གཏོང་བ་དང་། །ཐོས་དང་ཚུལ་ཁྲིམས་ཤེས་རབ་དང་། །ཁྲེལ་ཡོད་ངོ་ཚ་ཤེས་པ་སྟེ། །འཕགས་ནོར་བདུན་དང་ལྡན་པར་ཤོག །སྡེ་སྣོད་གསུམ་དང་རྒྱུད་སྡེ་བཞི། །འཆད་རྩོད་འདྲེས་པར་མི་མངའ་བའི། །ཐུགས་རྗེ་རྒྱུན་ཆད་མེད་པ་ཡི། །བླ་མ་རྣམས་དང་མཇལ་བར་ཤོག །དེས་གསུངས་སོ་ཐར་བྱང་སེམས་དང་། །རིག་འཛིན་སྔགས་ཀྱི་བསླབ་བྱ་རྣམས། །ཇི་ལྟར་ནོས་ཤིང་བསྲུངས་པ་དེ། །གོང་ནས་གོང་དུ་འཕེལ་བར་ཤོག །གསལ་སྟོང་དབྱེར་མེད་རྟོགས་པ་དང་། །སྣང་སྟོང་ཟུང་དུ་འཇུག་པ་དང་། །བདེ་སྟོང་བླ་ན་མེད་པ་ཡིས། །སྒྲིབ་གཉིས་བག་ཆགས་དག་པར་ཤོག །འདོད་པ་ཆུང་ཞིང་ཆོག་ཤེས་དང་། །བྱང་ཆུབ་སེམས་དང་ལྡན་པ་ཡིས། །ལོག་པའི་འཚོ་བ་ཀུན་སྤངས་ནས། །ཆོས་ཀྱི་འཚོ་བས་འཚོ་བར་ཤོག །གང་ཞིག་དགྲ་བཅོམ་ཕ་མ་གསོད། །མཐུན་པའི་དགེ་འདུན་དབྱེན་བྱེད་ཅིང་། །དེ་བཞིན་གཤེགས་ལ་སྐུ་ཁྲག་འབྱིན། །མཚམས་མེད་ལྔ་ལས་ཐར་བར་ཤོག །མཆོད་རྟེན་བཤིག་དང་བྱང་སེམས་གསོད། །དགྲ་བཅོམ་མ་ལ་སུན་འབྱིན་པ། །སློབ་པ་གསོད་དང་མཆོད་ནོར་རྐུ། །ཉེ་བ་ལྔ་ལས་ཐར་བར་ཤོག །གསོད་རྐུ་རྫུན་དང་འདོད་ལོག་སྤྱོད། །ཕྲ་མ་ཚིག་རྩུབ་ངག་འཁྱལ་སྨྲ། །བརྣབ་སེམས་གནོད་སེམས་ལོག་པར་ལྟ། །མི་དགེ་བཅུ་ལས་ཐར་བར་ཤོག །མནར་མེད་ཚ་བ་རབ་ཚ་དང་། །ངུ་འབོད་ཅན་དང་ངུ་འབོད་ཆེ། །བསྡུས་འཇོམས་ཐིག་ནག་ཡང་སོས་ཏེ། །ཚ་དམྱལ་བརྒྱད་ལས་ཐར་བར་ཤོག །ཆུ་བུར་ཅན་དང་ཆུ་བུར་རྡོལ། །སོ་ཐམ་ཨ་ཆུ་ཀྱི་ཧུད་དང་། །ཨུཏྤལ་པདྨ་ལྟར་གས་ཤིང་། །གྲང་དམྱལ་བརྒྱད་ལས་ཐར་བར་ཤོག །ཉེ་ཚེ་ཉེ་འཁོར་རོ་མྱག་འདམ། །མི་གཙང་འདམ་དང་མེ་མ་མུར། །ཆུ་བོ་རབ་མེད་ཤལ་མ་རི། །དེ་དག་གནས་ལས་ཐལ་བར་ཤོག །ཕྱི་སྒྲིབ་ཅན་དང་ནང་སྒྲིབ་ཅན། །ཟས་སྐོམ་གཉིས་ཀའི་སྒྲིབ་པ་ཅན། །མེ་ལྕེའི་འཁོར་ལོ་ཅན་ལ་སོགས། །ཡི་དྭགས་གནས་ལས་ཐར་བར་ཤོག །བྱིངས་ལ་གནས་དང་ཁ་འཐོར་གནས། །གླེན་ལྐུག་གཅིག་ལ་གཅིག་ཟ་དང་། །གསོད་གཅོད་བཀོལ་རྡུང་བྱེད་ལ་སོགས། །དུད་འགྲོའི་གནས་ལས་ཐར་བར་ཤོག །ལྷ་ལ་འཕོ་དང་ལྟུང་བ་དང་། །ལྷ་མ་ཡིན་ལ་འཐབ་རྩོད་དང་། །མི་ལ་སྐྱེ་རྒ་ན་འཆི་སོགས། །སྡུག་བསྔལ་གནས་ལས་གཟིགས་ཀྱི་སྙིང་རྗེ་དང། །ཕྱག་ན་རྡོ་རྗེའི་མཐུ་སྟོབས་ཀྱིས། །བདེ་བ་ཅན་དུ་སྐྱེ་བར་ཤོག །ཤཱ་རི་བུ་ཡི་ཤེས་རབ་དང་། །མོ་འུ་འགལ་གྱི་རྫུ་འཕྲུལ་དང་། །ཀུན་དགའ་བོ་ཡི་ཐོས་པ་ཡིས། །བདེ་བ་ཅན་དུ་སྐྱེ་བར་ཤོག །སཱ་ར་ཧ་ཡི་རྟོགས་པ་དང་། །ཀླུ་སྒྲུབ་སྙིང་པོའི་མཁྱེན་པ་དང་། །འབིར་ཝ་པ་ཡི་བྱིན་རླབས་ཀྱིས། །བདེ་བ་ཅན་དུ་སྐྱེ་བར་ཤོག །དཀོན་མཆོག་གསུམ་གྱི་བདེན་པ་དང་། །སངས་རྒྱས་བྱང་སེམས་བྱིན་རླབས་དང་། །ཚོགས་གཉིས་ཡོངས་རྫོགས་མངའ་ཐང་སྟེ། །ཆོས་ཉིད་བདེན་པས་འགྲུབ་པར་ཤོག སྤངས་རྟོགས་མཐར་ཕྱིན་སངས་རྒྱས་དང་། །ལུང་དང་རྟོགས་པ་དམ་པའི་ཆོས། །ས་བཅུའི་བྱང་སེམས་དགེ་འདུན་ཏེ། །དཀོན་མཆོག་གསུམ་གྱི་བཀྲ་ཤིས་ཤོག། _{ཅེས་པ་སློབ་དཔོན་ཀླུ་སྒྲུབ་ཀྱིས་མཛད་པའོ།།}