སྨོན་ལམ་མཧཱ་གུ་རུ།

༄༅། །མཧཱ་གུ་རུའི་སྨོན་ལམ་བཞུགས་སོ།།

༄༅། _{།གུང་ཐང་ལ་ཐོག་ཏུ་མཁའ་འགྲོ་མཚོ་རྒྱལ་གྱིས་གུ་རུའི་ཞབས་སྤྱི་བོར་བླང་སྟེ་སྨོན་ལམ་བཏབ་པ།} མ་ཧཱ་གུ་རུའི་བྱིན་རླབས་ཀྱིས། །བདག་ཅག་ཚེ་རབས་ཐམས་ཅད་དུ། །ཞིང་ཁམས་དག་པའི་ཕོ་བྲང་དུ། །བླ་མ་འབྲལ་མེད་བསྟེན་པར་ཤོག། །མོས་གུས་ལྟེམས་བརྐྱང་མེད་པ་ཡིས། །མཉེས་པའི་ཞབས་ཏོག་སྒྲུབ་པ་དང་། །དགོངས་པ་ཟབ་མོ་ཐུགས་ཀྱི་བཅུད། །བྱིན་རླབས་བདུད་རྩིའི་ལུང་ཐོབ་ཤོག། །སྐུ་གསུང་ཐུགས་ཀྱི་བྱིན་རླབས་ཀྱིས། །ལུས་ངག་ཡིད་གསུམ་སྨིན་པ་དང་། །ཟབ་མོའི་བསྐྱེད་རྫོགས་རྣམ་གཉིས་ལ། །དབང་གི་སྒྲུབ་པར་ཐོབ་པར་ཤོག། །ལོག་ལྟ་བདུད་ཀྱི་ཚོགས་རྣམས་དང་། །ནད་གདོན་རྣམ་རྟོག་ཞི་བ་དང་། །འཁོར་དང་ལོངས་སྤྱོད་རྒྱས་པ་ཡིས། །བསམ་པ་ཡིད་བཞིན་འགྲུབ་པར་ཤོག། །དུར་ཁྲོད་རི་ཁྲོད་གངས་ཁྲོད་སོགས། །ཕུན་སུམ་ཚོགས་པའི་གནས་ཉིད་དུ། །ཏིང་འཛིན་ཟབ་མོའི་དགོངས་སྤྱོད་ལ། །རྟག་ཏུ་སྒྲུབ་པ་བྱེད་པར་ཤོག། །སྒྲུབ་པ་བྱེད་པའི་འབྲས་བུ་ཡིས། །ཕྲིན་ལས་རྣམ་བཞི་འགྲུབ་པ་དང་། །ལྷ་སྲིན་བྲན་དུ་འཁོལ་ནས་ཀྱང་། །སངས་རྒྱས་བསྟན་པ་བསྲུང་བར་ཤོག། །སྟོན་པས་གསུངས་པའི་དམ་ཆོས་རྣམས། །རྩོལ་མེད་རྒྱུད་ལ་འཆར་བ་དང་། །མཁྱེན་པ་མཆོག་ལ་མངའ་བརྙེས་ཤིང་། །རྟོགས་པ་མཆོག་དང་ལྡན་པར་ཤོག། །བྱང་ཆུབ་སེམས་ཀྱི་རྟེན་འབྲེལ་གྱིས། །སྐྱེ་འགྲོ་ཐམས་ཅད་དབང་འདུས་ནས། །ཐོགས་མེད་ཡིད་བཞིན་ནོར་བུའི་གཏེར། །འབྲེལ་ཚད་དོན་དང་ལྡན་པར་ཤོག། །སངས་རྒྱས་བསྟན་པ་དར་བའི་མཐུས། །བརྒྱུད་འཛིན་ཆོས་དོན་རྒྱས་པ་དང་། །འགྲོ་ཀུན་བདེ་ལ་འཁོད་ནས་ཀྱང་། །ཞིང་ཁམས་ཐམས་ཅད་དག་པར་ཤོག། །བདག་གི་ལུས་ངག་ཡིད་གསུམ་གྱིས། །གདུལ་བྱ་སོ་སོའི་བློ་ཡུལ་དུ། །གང་ལ་གང་འདུལ་སྤྲུལ་པའི་སྐུ། །དཔག་ཏུ་མེད་པ་འབྱུང་བར་ཤོག། །མདོར་ན་འཁོར་འདས་མ་ལུས་ཀུན། །གུ་རུ་ཉིད་དང་དབྱེར་མེད་ཅིང་། །སྐུ་གསུམ་འདུ་འབྲལ་མེད་པ་ཡི། །རྣམ་མཁྱེན་སངས་རྒྱས་ཐོབ་པར་ཤོག། །སེམས་ཅན་གསོལ་བ་འདེབས་པར་ཤོག། །བླ་མས་བྱིན་གྱིས་རློབས་པར་ཤོག། །ཡི་དམ་དངོས་གྲུབ་སྟེར་བར་ཤོག། །མཁའ་འགྲོས་ལུང་བསྟན་བྱེད་པར་ཤོག། །ཆོས་སྐྱོང་བར་ཆད་སེལ་བར་ཤོག །སངས་རྒྱས་བསྟན་པ་དར་ཞིང་རྒྱས་པར་ཤོག། སེམས་ཅན་ཐམས་ཅད་བདེ་ཞིང་སྐྱིད་པར་ཤོག། །ཉིན་དང་མཚན་དུ་ཆོས་ལ་སྤྱོད་པར་ཤོག། །རང་གཞན་དོན་གཉིས་ལྷུན་གྱིས་འགྲུབ་པར་ཤོག། །རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ནས། །སྲིད་མཚོར་སླར་ཡང་མི་གནས་ཤིང་། །ཕྱམ་གཅིག་སངས་རྒྱས་མྱུར་ཐོབ་ཤོག། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་ཐེག་པ་འདི། །ཇི་ལྟར་མཁའ་ལ་ཉི་ཤར་ལྟར། །རྒྱལ་ཁམས་ཡོངས་ལ་དར་རྒྱས་ཤོག། །བདག་གི་དགེ་བའི་རྩ་བ་འདི་དག་དགེ་བའི་རྩ་བ་མཐའ་དག་ཏུ་གྱུར་ནས་བླ་མ་དམ་པའི་ཐུགས་དགོངས་ཡོངས་སུ་རྫོགས་པའི་ཡོན་ཏན་དང་ལྡན་པར་གྱུར་ཅིག། །སངས་རྒྱས་བསྟན་པ་དར་ཞིང་རྒྱས་པ་ཡི། སྐྱེས་བུ་སྟོབས་ལྡན་དུ་གྱུར་ཅིག། །མཁྱེན་བརྩེ་ནུས་གསུམ་མཐར་ཕྱིན་ནས་རྫོགས་པའི་སངས་རྒྱས་སུ་གྱུར་ཅིག། །རིགས་དྲུག་གི་སེམས་ཅན་ཐམས་ཅད་འཁོར་བ་དང་ངན་སོང་གི་སྡུག་བསྔལ་ཆེན་པོ་ལས་སྒྲོལ་ནུས་པའི་དེད་དཔོན་ཆེན་པོར་སྐྱེ་བར་གྱུར་ཅིག། །དེ་ཁོ་ན་བཞིན་དུ་འགྲུབ་པར་གྱུར་ཅིག། _{།བདག་པདྨ་གླིང་པས་ལྷོ་བྲག་སྨན་མདོའི་བྲག་སེངྒེའི་གདོང་པ་ཅན་ནས་གདན་དྲངས་པའོ།།} ༈ རྗེ་བཙུན་ཁྱེད་དང་ཐུགས་རྗེ་མཉམ་པར་ཤོག། །རྒྱལ་སྲས་ཁྱེད་དང་གདུལ་བྱ༴། །ཐོད་ཕྲེང་རྩལ་དང་ཕྲིན་ལས༴། །ཚེ་དཔག་མེད་དང་སྐུ་ཚེ༴། །འཇམ་དཔལ་དབྱངས་དང་མཁྱེན་རབ༴ །སྤྱན་རས་གཟིགས་དང་འགྲོ་དོན༴། །གསང་བའི་བདག་དང་མཐུ་སྟོབས༴། །ལོངས་སྤྱོད་རྫོགས་དང་མཚན་དཔེ་མཉམ་པར་ཤོག། །ཀུན་ཏུ་བཟང་དང་ཞིང་ཁམས་མཉམ་པར་ཤོག། །ནམ་ཞིག་ཚེ་ཡི་འདུ་བྱེད་གཏོང་བའི་ཚེ། །མི་གཙང་ལུས་འདིའི་སྒྱུ་མ་བོར་མ་ཐག། །བདེ་བ་ཅན་དུ་རྫུས་ཏེ་སྐྱེ་བར་ཤོག། །སྐྱེ་མ་ཐག་ཏུ་ས་བཅུ་རབ་རྫོགས་ཏེ། །སྤྲུལ་པ་རེ་རེ་བདག་གིས་བཀྱེ་ནས་ཀྱང་། །ཐམས་ཅད་འདྲེན་པའི་དེད་དཔོན་བདག་གྱུར་ཅིག། །བདག་གཞན་གཉིས་མེད་ཆོས་སྐུ་མཐར་ཕྱིན་ནས།ཀ་དག་གདོད་མའི་དབྱིངས་སུ་གྲོལ་བར་ཤོག། _{།སྨོན་ལམ་འདི་རྒྱལ་དབང་བསྟན་འཛིན་གྲགས་པའི་གསུང་ཡིན་ནོ།} །བསྔོ་བ་དང་སྨོན་ལམ་ཡོངས་སུ་འགྲུབ་པའི་རྒྱལ་པོ་ལ་ཕྱག་འཚལ་ལོ། །ཨོཾ་དྷ་རེ་དྷ་རེ་བྷན་དྷ་རེ་བྷན་དྷ་རེ་སྭཱཧཱ། །དགེ་བ་སྟོབས་ཆེ་བ་གྱུར་ཅིག། །སྡིག་པ་འདག་སྐྱེན་པར་གྱུར་ཅིག། །སྨོན་ལམ་མཐུ་བཙན་པར་གྱུར་ཅིག། །ཛ་ཡ་ཛ་ཡ་སིདྡྷི་སིདྡྷི་ཕ་ལ་ཕ་ལ་བཀྲ་ཤིས་པར་གྱུར་ཅིག། །དེ་ལྟར་འགྲུབ་པ་ཡང་དཀོན་མཆོག་གསུམ་གྱི་བདེན་པ་དང་། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། །ཚོགས་གཉིས་ཡོངས་སུ་རྫོགས་པའི་མཐུ་དང་། །ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་ཇི་ལྟར་སྨོན་པ་དེ་དེ་བཞིན་དུ་འགྲུབ་པརགྱུརཅིག།