སྐྱིད་པའི་བདེ་ཆེན་ཆོས་གླིང་། ༼རྫོང་ཁའི་ཞབས་ཁྲ།༽

༉ སྐྱིད་པའི་བདེ་ཆེན་ཆོས་གླིང་།། པདྨའི་དཔལ་ཐང་ལ།། གསེར་གྱི་གཞོང་པ་འདྲ་དོ།། རིགས་བཟང་བུ་མོ་རུ་རུ།། གསེར་གྱི་གཞོང་པའི་ནང་དུ།། པདྨའི་དཔལ་ཐང་ལ།། རྒྱལ་པོའི་ཕོ་བྲང་བཞེངས་ཡོད།། རིགས་བཟང་བུ་མོ་རུ་རུ།། རྩེ་མོག་སེར་ཏོག་སྤུབས་པ།། པདྨའི་དཔལ་ཐང་ལ།། ནམ་མཁའི་དབྱིངས་ལས་མཐོ་བྱུང་།། རིགས་བཟང་བུ་མོ་རུ་རུ།། ཉིམ་དང་ཟླ་བས་མ་གཏོགས།། པདྨའི་དཔལ་ཐང་ལ།། གཞན་གྱིས་མཇལ་ས་མིན་འདུག། རིགས་བཟང་བུ་མོ་རུ་རུ།། སྐེད་པ་རིན་ཆེན་སྣ་ལྔ་།། པདྨའི་དཔལ་ཐང་ལ།། མངའ་བདག་གོང་མ་བཞུགས་ཡོད།། རིགས་བཟང་བུ་མོ་རུ་རུ།། རྩ་བ་ལྕགས་རིས་བསྐོར་བ།། པདྨའི་དཔལ་ཐང་ལ།། གཡུ་ཡི་རྡོ་གཅལ་བསྒྲིགས་ཡོད།། རིགས་བཟང་བུ་མོ་རུ་རུ།། གཡུ་ཡི་རྡོ་གཅལ་སྟེང་ལ།། པདྨའི་དཔལ་ཐང་ལ།། རྨ་བྱའི་སྒྲོ་རིས་ཤིག་ཤིག། རིགས་བཟང་བུ་མོ་རུ་རུ།། །།