དགེ་བསྙེན་གྱི་གཉེར་གསོལ།
༑ དགེ་བསྙེན་གྱི་གཉེར་གསོལ་ནི།
ཧོ༔ དཔལ་ཆེན་རྟ་མཆོག་དབང་གི་རྒྱལ་པོའི་ཐུགས་སྤྲུལ་དཔལ་ལྡན་འབྲུག་པའི་བསྟན་སྲུང་རྡོ་རྗེ་དགྲ་འདུལ་མགྱོགས་བྱེད་རྩལ་འཁོར་དང་བཅས་པ་རྣམས་གསན་ཅིང་དགོངས་སུ་གསོལ། སེམས་ཅན་ཐམས་ཅད་ཀྱི་ཕན་དང་བདེ་བའི་འབྱུང་གནས་བླ་ན་མེད་པ་རྒྱལ་བའི་བསྟན་པ་སྤྱི་དང་། བྱེ་བྲག་དཔལ་ལྡན་འབྲུག་པའི་བསྟན་པ་དེ་འཛིན་ཆོས་འཁོར་དང་བཅས་པ་བསྲུང་ཞིང་སྐྱོང་བ་དང་། ལྷག་པར་བདག་ཅག་རྒྱུ་སྦྱོར་ཡོན་གནས་འཁོར་དང་བཅས་པ་གཞིས་བྱེས་ལམ་འཕྲང་སོགས་སུ་ལས་དང་བྱ་བ་ཅི་བགྱིད་པའི་སྟོངས་གྲོགས་མདུན་བསུ་རྒྱབ་སྐྱེལ་སེམས་ཀྱི་རིག་རྩལ། ལུས་ཀྱི་དཔའ་གཟི་ཚེ་དང་བསོད་ནམས་སོགས་དབྱར་མཚོ་ལྟར་སྤེལ་བ་དང་། མི་བསྲུན་གདུག་པའི་བསམ་པ་ཅན་གྱི་དགྲ་དང་བགེགས་རྣམས་རྨེད་མེད་དུ་བཅོམ་ནས། །མཐར་ཐུག་མཆོག་གི་དངོས་གྲུབ་ལ་སྦྱོར་བའི་མཐུན་རྐྱེན་སྒྲུབ་པར་མཛད་དུ་གསོལ། །ཞེས་པ་རྗེ་འཇམ་དབྱངས་རྒྱལ་མཚན་པས་སོ། །ཨོཾ་ཡེ་དྷརྨ་སོགས་བྱ། ཐུགས་གསུང་སྐུའི་ལྷ་ཚོགས་ལ་བསྟོད་པ་བསྡུས་པ་ནི། ཧཱུྃ༔ བདེ་གཤེགས་ཐུགས་རྗེས་སྐུ་སྤྲུལ་པ། །སེམས་ཅན་རྣམས་ལ་མགོན་སྐྱབས་མཛད། །འོག་མིན་གནས་ན་བཞུགས་པ་ལ། །རབ་ཏུ་བཏུད་དེ་གུས་ཕྱག་འཚལ། །བཅོམ་ལྡན་འདས་ཀྱི་སྐུར་བསྟན་པ། །འདྲེན་པ་འཇིག་རྟེན་མཁའ་འགྲོའི་གཙོ། །དྲག་པོ་མ་རུང་འདུལ་མཛད་པ། །མཧཱ་ཀཱ་ལིར་ཕྱག་འཚལ་བསྟོད། །འཇིག་རྟེན་ལ་གནས་གདུག་པ་འདུལ། །དུར་ཁྲོད་མ་མོ་རྣམས་ཀྱི་གཙོ། །ལྷ་ཆེན་དྲག་པོའི་སྐུར་སྟོན་པ། །འཇིག་རྟེན་མགོན་ལ་ཕྱག་འཚལ་བསྟོད། །ལྷ་མོའི། བྷྱོཿ སྔོན་ཚེ་དཔག་བསམ་བྱང་ཆུབ་ཤིང་གི་དྲུང་། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་བསྲུང་བར་དམ་བཅས་པའི། །ཁྲག་འཐུང་དུད་སོལ་སྐུ་ལ་ཕྱག་འཚལ་བསྟོད།།