དག་སྣང་བླ་སྒྲུབ་དོན་བསྡུས་གསོལ་འདེབས།

༈ དག་སྣང་བླ་སྒྲུབ་དོན་བསྡུས་གསོལ་འདེབས་བྱིན་རླབས་སྤྲིན་ཕུང་བཞུགས་སོ།།

༈ ཧྲཱིཿ མགོན་པོ་ཚེ་དཔག་མེད་དང་པདྨ་འབྱུང་། །དབྱེར་མེད་གཅིག་འདུས་ངག་དབང་རྣམ་པར་རྒྱལ། །བཀའ་དྲིན་འཁོར་མེད་རྩ་བའི་བླ་མ་ལ།།བདག་སོགས་རྩེ་གཅིག་གུས་པས་གསོལ་བ་འདེབས། །ནམ་ཞིག་ཚེ་འདིའི་སྣང་བ་ནུབ་མ་ཐག། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཨོ་ཨཱཿགུ་རུ་ཝ་གིནྡྲ་བི་ཛ་ཡ་ཨ་ཡུརྫྙཱ་ན་སིདྡྷི་ཧཱུྃ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུཾ། ཨོཾ་ཨ་མ་རཱ་ནི་ཛཱི་ཝནྟཱིཡེ་སྭཱཧཱ། _{ཞེས་ཅི་ནུས་བཟླ།} དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག། _{།ཅེས་པའང་མི་མང་ཡོངས་ལ་ཕན་ཕྱིར་འཇིགས་གྲགས་པས་སོ།།}