མགོན་བསྟོད་རྐང་བརྒྱད།
༈ རྐང་བརྒྱད་ནི།
ཨོཾ་གྲུབ་པར་གྱུར་ཅིག །ཧ་ཧ་ཧཱུཾ་དང་ཀཱི་ལི་ཀཱི་ལི་ཞེས་སྒྲོག་འབྱུང་པོ་རོ་ལངས་ཚོགས་རྣམས་མྱུར་བསད་ནས། །སྐུ་ལ་མི་ཡི་ཤ་དང་རྒྱུ་མས་སྦྲེལ་བའི་འཕྲེང་བས་ཀུན་ནས་བརྒྱན་ཅིང་ཞལ་དུ་གསོལ། །འདོད་པའི་གཟུགས་དང་མི་སྡུག་གཟུགས་ཅན་ཕྱག་གཡོན་ཁ་ཊཾ་ག་བཅས་མི་ཡི་ཐོད་པ་བསྣམས། །སྨིན་སྐྲ་སེར་ཞིང་སྤྱན་དམར་རོ་ཡི་གདན་ལ་དགྱེས་པའི་ཞིང་སྐྱོང་ཁྱོད་ཀྱིས་ཞིང་སྐྱོངས་མཛོད། །ཕེཾ་ཕེཾ་ཕཊ་ཅེས་སྒྲོགས་པས་སོ་སོར་བསྐྱོད་པའི་མེ་དཔུང་ཆེན་པོའི་དབུས་སུ་རབ་བཞུགས་ནས། །རབ་ཏུ་གསལ་ཞིང་མགོ་བོ་རྣམས་ཀྱི་འཕྲེང་བས་འཇིགས་པའི་སྐུ་བརྒྱན་གཤིན་རྗེ་དང་མཚུངས་པ། །དྲག་ཤུལ་ཕྱག་གིས་བསད་པ་རྣམས་ཀྱི་མི་མགོ་མ་ལུས་བཟུང་ནས་ཁྲག་རྒྱུན་འབབ་པ་གསོལ། །རོལ་པས་རོལ་པ་སེལ་ཞིང་མི་ཡིས་གང་བའི་ས་ལ་ཞིང་སྐྱོང་ཁྱོད་ཀྱིས་སྲུང་བར་མཛོད། །ཀྵཾ་ཀྵཾ་ཀྵཾ་ཞེས་བཟོད་པའི་སྐད་ཅན་ཅ་ཅོ་སྒྲོག་པར་བྱེད་པའི་གདུག་པ་རྣམས་བཟུང་སྟེ། །གཅིག་པུས་སྣ་ཚོགས་མནན་ཅིང་མནན་ནས་ཀ་ཧ་ཀ་ཧ་བརྗོད་མཛད་ཆར་སྤྲིན་སྔོན་པོའི་མདོག །ཧྲིཾ་ཧྲིཾ་ཧྲིཾ་ཞེས་སྔགས་ཀྱི་གསུང་ཅན་པ་ཙ་པ་ཙའི་སྔགས་ཀྱིས་རིགས་ཀྱི་ལུས་ཅན་བསྲེག །སྒྲུབ་པོ་རྣམས་ཀྱིས་བགེགས་རྣམས་མྱུར་དུ་སྐྱོད་པར་མཛད་ཅིང་ཞིང་རྣམས་ངེས་པར་ཞིང་སྐྱོངས་མཛོད། །ཧཱུྃ་ཧཱུྃ་ཕཊ་ཅེས་དྲག་པོ་སྒྲ་ཡིས་སྲིད་པ་གསུམ་གྱི་ཁོངས་ནི་མ་ལུས་འགེངས་ནུས་ཤིང་། །ཧ་ཧ་ཌ་ཌ་ཞེས་བཞད་གང་ཞིག་དུས་ཀུན་ཏུ་ནི་ཤིན་ཏུ་རབ་ཏུ་འཇིགས་མཛད་པ། །ཕྱུགས་རྣམས་ཀྱི་ནི་ཉིན་རེ་བཞིན་དུ་བདུད་དང་བགེགས་འཇོམས་དྲི་མེད་ཉེས་པ་ཆུ་ཟླ་བཞིན། །དབུ་སྐྲ་སྨ་རའི་རལ་པ་ཆེས་སེར་ཉེ་བར་བསྐྱོད་པའི་ཞིང་སྐྱོང་ཁྱོད་ཀྱིས་ཞིང་སྐྱོང་མཛོད། །རཾ་རཾ་རཾ་ཞེས་སྤྱན་དམར་འཁྲུག་ཅིང་བསྒྱུར་མཛད་ཀྲུཾ་ཀྲུཾ་ཀྲུཾ་ཞེས་ཁྲོས་པའི་སྤྱན་གྱིས་གཟིགས། །ཁཾ་ཁཾ་ཁཾ་ཞེས་གཏུམ་པའི་ཤུགས་ཀྱིས་ཕྱག་གཡས་གྲི་གུག་རལ་གྲི་བགེགས་རྣམས་རོལ་མཛད་ཅིང་། །རུ་རུ་རུ་ཞེས་ཁྲག་ནི་ཕྱག་གིས་བསྣམས་ཤིང་ཞལ་དུ་གསོལ་མཛད་འཐུང་བ་ལ་དགྱེས་པ། །ཌཾ་ཌཾ་ཌཾ་ཞེས་ཌཱ་མ་རུ་ཅན་འདི་ཡིས་འདུལ་མཛད་འཁོར་བཅས་ཞིང་སྐྱོང་ཁྱེད་ཀྱིས་སྐྱོངས། །ཀཾ་ཀཾ་ཀཾ་ཞེས་ཐོད་པའི་འཕྲེང་བས་དབུ་ལ་སྤྲས་ཤིང་ནག་པོ་ཆུ་དང་འདྲ་བའི་སྐུ། །ཙཾ་ཙཾ་ཙཾ་ཞེས་གཏུམ་པའི་ཤུགས་ཀྱིས་རབ་གཡོས་རྨད་བྱུང་འོད་ཀྱིས་འཇིག་རྟེན་སྣང་མཛད་པ། །ཀྲཾ་ཀྲཾ་ཀྲཾ་ཞེས་གཤེགས་པས་དགྲ་བོ་ཉོན་མོངས་པ་རྣམས་ངེས་པར་མ་ལུས་འཇོམས་མཛད་ཅིང་། །སཾ་སཾ་སཾ་ཞེས་ཚོགས་པའི་བདག་ཉིད་དམ་ཚིག་ཐོས་འཛིན་ཞིང་སྐྱོང་གང་ཡིན་ཁྱེད་ཀྱིས་སྐྱོངས། །བཾ་བཾ་བཾ་ཞེས་སྣ་ཚོགས་གཤིན་རྗེ་ལྟར་འགྲོ་དྲི་མ་མེད་པའི་ཆུ་བཞིན་གཟིགས་མཛད་པ། །ཡཾ་ཡཾ་ཡཾ་ཞེས་རླུང་གི་ཤུགས་ཀྱིས་མྱུར་དུ་རྒྱུ་ཞིང་ཉོན་མོངས་འཇིག་རྟེན་གནོན་བྱེད་མཁན། །བྷྲུཾ་བྷྲུཾ་བྷྲུཾ་ཞེས་ནུས་པ་མཆོག་གི་ཁྲོ་གཉེར་འཇིགས་མཛད་འཇིགས་པའི་ཁ་གདངས་ཤ་ཟ་ཞིང་། །ཀྵཾ་ཀྵཾ་ཀྵཾ་ཞེས་ཕན་པར་མཛད་ཅིང་གནོད་པ་སྐད་ཅིག་གིས་སེལ་ཞིང་སྐྱོང་ཁྱོད་ཀྱིས་སྐྱོངས། །ཀླཾ་ཀླིཾ་ཀླུཾ་ཞེས་གདུག་པའི་གཟུགས་ཀྱིས་སྲིད་གསུམ་ཉིན་མཚན་དུས་ཀུན་ཉོན་མོངས་གྱུར་པ་གང་། །པཾ་པཾ་པཾ་ཞེས་ཐུགས་རྗེའི་ཞགས་པས་བྱོལ་སོང་རྣམས་འཛིན་ཕྱག་གིས་གདུལ་བྱ་རྣམས་སྐྱོང་བ། །སྔགས་ཀྱི་སྐུ་ཅན་སྔགས་བདག་ཐུགས་ཀྱིས་སྔགས་པ་རྣམས་ལ་བློ་གྲོས་འབྲས་བུ་མཚུངས་མེད་སྟེར། །ཞིང་རྣམས་སྐྱོང་བར་མཛད་པ་རྣམས་ཀྱིས་འགྲོ་བ་མ་ལུས་པ་རྣམས་ཡུན་རིང་སྐྱོང་དུ་གསོལ། །སྒྲུབ་པ་པོའམ་སློབ་དཔོན་གང་ཞིག་དམ་ཚིག་ཐོས་འཛིན་བློ་ལྡན་གུས་པ་དང་བཅས་པ། །ཐུན་གསུམ་དུ་ནི་སྔགས་རྣམས་བརྒྱད་པོ་ཀློག་བྱེད་དེ་ནི་བསོད་ནམས་ལྡན་པར་འགྱུར་བ་དང་། །ཚེ་དང་དཔལ་དང་གྲགས་དང་མཐུ་སྟོབས་འབྱོར་པ་འཛིན་ཅིང་བློ་གྲོས་རྒྱས་པ་མཚུངས་མེད་སྟེར། །ས་སྟེང་དང་ནི་མཐོ་རིས་སུ་ཡང་དེ་ཡི་བགེགས་ཀྱི་ཚོགས་རྣམས་རྟག་ཏུ་ཉམས་པར་འགྱུར།།
Reference
དཔལ་ལྡན་འབྲུག་པའི་གསུང་རབ། ༢༠༠༩ དཔལ་ལྡན་འབྲུག་པའི་ལུགས་ཀྱི་ཞལ་འདོན་ཕྱོགས་བསྡེབས་བྱང་ཆུབ་མགྲོད་པའི་ལམ་བཟང་ཞེས་བྱ་བ་བཞུགས་སོ། ཏཱའི་པེ། ཏཱའི་ཝཱན།