མགོན་པོའི་ཚོགས།

༄༅། །མགོན་པོའི་ཚོགས་ནི།

_{ཚོགས་རྫས་རྣམས་ལ་བསང་ཆུ་དང་བདུད་རྩི་གཏོར་ནས། ལག་པ་གཡོན་པ་གདེངས་ཏེ།} ཚོགས་རྫས་རྣམས་ཨོཾ་མ་དག་པ་སྦྱངས། _{གཡས་པ་གདེངས་ཏེ།} ཨཱས་མང་པོར་སྤེལ། _{སྙིམ་པ་བཀབ་སྟེ།} ཧཱུྃ་ཡིག་གིས་སྦར་བ་སྟེ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བྱས། _{མཁའ་ལྡིང་གི་ཕྱག་རྒྱས།} ཧོཿཟག་མེད་ཡེ་ཤེས་ཀྱི་བདུད་རྩིའི་རྒྱམཚོ་ཆེན་པོར་ཞུ་བར་_བསམ། ཧཱུྃ༔ དབྱིངས་སྲིད་ཞི་ཀུན་ཏུ་འཆར་བའི་མ། །དཔལ་རྡོ་རྗེ་ཡན་ལག་མ་མོའི་འཕྲུལ། །མཚན་ཀུན་ལྡན་ཡེ་ཤེས་ཀཱ་པ་ལ། །དེ་བསམ་གྱིས་མི་ཁྱབ་ནམ་མཁའ་ཙམ། །ཨ་ར་ལི་རྣལ་འབྱོར་གྱི་འདུས་པ་ལ། །འདོད་ཡོན་གྱི་ལོངས་སྤྱོད་མི་ཟད་པ། །ཧ་ཧོཿཧཱིཿཁ་དོག་དྲི་རོའི་ཚོགས། །མཆོག་རྣམ་པ་ཀུན་ལྡན་སྟོང་པའི་དཔྱིད། །ཨོཾ་ཨཱཿཧཱུཾ་སྦྱངས་རྟོགས་སྦར་བས་ན། །དཔལ་མི་འགྱུར་བདེ་བ་ཆེན་པོའི་གནས། །ས་ཧ་ཛ་སོ་སོ་རང་རིག་གིས། །ཁ་སྦྱོར་གྱི་འཁོར་ལོ་གཅིག་ཏུ་བསྡམ། _{།ཚོགས་ཞིང་སྤྱན་དྲང་བ་ནི།} ཧཱུྃ། ཐུགས་ཟུང་འཇུག་རྒྱལ་བ་ཀུན་གྱི་དངོས། །གསུང་ཆོས་ཀྱི་འཁོར་ལོ་ཐམས་ཅད་པ། །སྐུ་རྣམ་པ་ཀུན་ལྡན་ཚོགས་ཀྱི་མཆོག །སྐྱབས་གསུམ་གྱི་འདུས་པ་བླ་མ་རྗེ། །འཁོར་བརྒྱུད་པའི་བླ་མ་ཉི་ལི་ལི། །སྐུ་མཛེས་པའི་རུས་རྒྱུན་ཁྲོ་ལོ་ལོ། །གསུང་ཐེག་ཆེན་ཆོས་སྒྲ་འུ་རུ་རུ། །ཐུགས་དགྱེས་པའི་གར་སྟབས་ལིང་ངེ་ངེ། །ངེད་བུ་སློབ་ཚོགས་ཀྱི་དཔོན་ལ་གཤེགས། །བཅུད་དམ་རྫས་རྣམས་ལ་བྱིན་རླབས་ཞུ། །མཆོག་ཐུན་མོང་དངོས་གྲུབ་གནང་ནས་ཀྱང་། །ཡབ་ཁྱེད་དང་མཉམ་པར་བྱིན་གྱིས་རློབས། །དཀྱིལ་འཁོར་གྱི་པདྨའི་སྙིང་པོ་ཀུན། །རིས་མེད་པ་རྒྱལ་བའི་ཟེའུ་འབྲུས་གང་། །དངོས་གྲུབ་ཀྱི་ཟིལ་དངར་ཅི་དང་ཅི། །ཡིད་བཞིན་དུ་འབྱུང་བའི་ལྷག་པའི་ལྷ། །འཁོར་ཡི་དམ་ལྷ་ཚོགས་ཉི་ལི་ལི། །སྐུ་མཛེས་པའི༴ །གསུང་ཐེག་ཆེན༴ །ཐུགས་དགྱེས་པའི༴ །ངེད་བུ་སློབ༴། བཅུད་དམ་རྫས༴ །མཆོག་ཐུན་མོང༴ །ལྷ་ཁྱེད་དང་མཉམ་པར་བྱིན་གྱིས་རློབས། །ནང་ཡེ་ཤེས་ཉི་མ་ཟླ་བའི་རྫུ། །བར་ཆད་ཀྱི་མུན་པ་མཐར་བྱེད་ཅིང་། །ཡིད་སྐྱོབ་ཀྱི་སྣང་བ་ཀུན་སྟོན་པ། །ཡུམ་རྡོ་རྗེའི་བཙུན་མོ་རིགས་ལྔའི་སྡེ། །འཁོར་དཔའ་བོ་ཌཱ་ཀི་ཉི་ལི་ལི། །སྐུ་མཛེས་པའི༴ །གསུང་ཐེག་ཆེན༴ །ཐུགས་དགྱེས་པའི༴ །ངེད་བུ་སློབ༴ །བཅུད་དམ་རྫས༴ །མཆོག་ཐུན་མོང༴ །མ་ཁྱེད་དང་མཉམ་པར་བྱིན་གྱིས་རློབས། །ཁོང་བདུད་བཞིའི་གཡུལ་ངོ་རླག་བྱེད་དུ། །དཔལ་རྒྱལ་བ་རྒྱ་མཚོའི་སྙིང་རྗེའི་སྟོབས། །ལྷ་མི་ཟད་ཁྲོས་པ་དཔའ་བོའི་སྡེ། །མགོན་མཧཱ་ཀཱ་ལ་ལྕམ་དྲལ་རྣམས། །འཁོར་དྲེགས་པའི་ལྷ་སྲིན་ཉི་ལི་ལི། །སྐུ་མཛེས་པའི༴ །གསུང་ཐེག་ཆེན༴། ཐུགས་དགྱེས་པའི༴ །ངེད་བུ་སློབ༴ །བཅུད་དམ་རྫས༴ །མཆོག་ཐུན་མོང༴ །མགོན་ཁྱེད་དང་མཉམ་པར་བྱིད་གྱིས་རློབས། །ཚོགས་མཆོད་དང་པོ་ནི། རྗེ་སྲིད་ཞིའི་ཕན་པ་ཐམས་ཅད་དུ། །ཆུ་ཟླ་བཞིན་འགོག་པ་མེད་ཤར་བ། །དཔལ་དང་པོའི་མགོན་པོ་བླ་མའི་ཞབས། །བཀའ་བརྒྱུད་ཀྱི་རྗེ་བཙུན་རྒྱ་མཚོ་ལ། །མི་བདག་གི་ལུས་དགེ་ལོངས་སྤྱོད་ཀུན། །སྔགས་གསང་བ་ཆེན་པོའི་དམ་ཚིག་རྫས། །ཅི་སྤྱད་ཀྱང་མི་ཟད་ནམ་མཁའི་མཛོད། །འདོད་ཡོན་གྱི་དཔྱིད་དུ་སྦར་ཏེ་འབུལ། །ཚོགས་གཉིས་ཀྱི་ལང་ཚོ་རབ་གང་ཞིང་། །སྒྲིབ་གཉིས་ཀྱི་སྤྲིན་ལས་རྣམ་གྲོལ་བའི། །དཔལ་ཀུན་ཏུ་བཟང་པོའི་འོད་ཟེར་ནི། །ནམ་མཁའ་སྲིད་འགེངས་པའི་ནུས་པ་ཞུ།། _{གཉིས་པ་ནི།} ཞི་བ་དང་ཁྲོ་ཆགས་ཐམས་ཅད་པ། །སྐྱ་འཕྲུལ་གྱི་ཟློས་གར་ལ་ཤར་ནས། །དཀྱིལ་འཁོར་གྱི་འཁོར་ལོའི་མགོན་མཛད་པ། །ཡི་དམ་གྱི་ལྷ་ཚོགས་རྒྱ་མཚོ་ལ། །མི་བདག་གི༴ །སྔགས་གསང་བ༴ །ཅི་སྤྱད་ཀྱང༴ །འདོད་ཡོན་གྱི༴ །ཚོགས་གཉིས་ཀྱི༴ །སྒྲིབ་གཉིས་ཀྱི༴ །དཔལ་ཀུན་ཏུ༴ །ནམ་མཁའ་སྲིད་འགེངས་པའི་ནུས་པ་ཞུ།། _{གསུམ་པ་ནི།} འཁོར་འདས་ཀྱི་ངོ་མཚར་མ་ལུས་པ། །གཉིས་མེད་ལས་གཉིས་སུ་སྟོན་བྱེད་པའི། །སྲས་རྒྱལ་བ་ཐམས་ཅད་སྐྱེད་པའི་ཡུམ། །དཔའ་བོ་དང་ཊཱ་ཀི་རྒྱ་མཚོ་ལ། །མི་བདག་གི༴ །སྔགས་གསང་བ༴ །ཅི་སྤྱད་ཀྱང༴།འདོད་ཡོན་གྱི༴ །ཚོགས་གཉིས་ཀྱི༴། །སྒྲིབ་གཉིས་ཀྱི༴། །དཔལ་ཀུན་ཏུ༴ །ནམ་མཁའ་སྲིད་འགེངས་པའི་ནུས་པ་ཞུ། _{བཞི་པ་ནི།} བདུད་ཚོགས་ལ་བདུད་དང་ཆོས་པར་གཉེན། །སྙིང་རྗེ་ལས་རྣམ་པ་ཐམས་ཅད་པ། །ཁྲག་འཐུང་གི་རྒྱལ་པོ་དགའ་མར་བཅས། །དམ་ཅན་གྱི་ཆོས་སྐྱོང་རྒྱ་མཚོ་ལ། །མི་བདག་གི༴ །སྔགས་གསང་བ༴ །ཅི་སྤྱད་ཀྱང༴ །འདོད་ཡོན་གྱི༴ །ཚོགས་གཉིས་ཀྱི །སྒྲིབ་གཉིས་ཀྱི༴ །དཔལ་ཀུན་ཏུ༴ །ནམ་མཁའ་སྲིད་འགེངས་པའི་ནུས་པ་ཞུ།། །

༈ ཚོགས་བསྡུས་གསོག་པར་སྤྲོ་ན། ཨོཾ་ཆོས་རྣམས་མི་དམིགས་སྟོང་པའི་ངང་། །ཨཱཿཐོད་དཀར་དཔྲལ་བ་རང་ལ་བསྟན། །ཧཱུྃ་ཤ་ལྔ་ཡེ་ཤེས་བདུད་རྩི་ལྔ་། །ཚོགས་མཆོད་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ། །དཀར་བརྒྱུད་བླ་མ་ཐམས་ཅད་ལ། །ཚོགས་མཆོད་བདུད་རྩིའི་རྒྱ་མཚོ་འབུལ། །ཡི་དམ་དཀྱིལ་འཁོར་ལྷ་ཚོགས་ལ། །ཚོགས་མཆོད༴། །གནས་གསུམ་དཔའ་བོ་མཁའ་འགྲོ་ལ། །ཚོགས་མཆོད༴། །ཆོས་སྐྱོང་མ་མགོན་ལྕམ་དྲལ་ལ། །ཚོགས་མཆོད༴། །བཀའ་སྡོད་དམ་ཅན་རྒྱ་མཚོ་ལ། །ཚོགས་མཆོད༴ །ཆོས་བདག་གནས་བདག་ཐམས་ཅད་ལ། །ཚོགས་མཆོད༴། །མཆེད་དང་ལྕམ་དྲལ་ཐམས་ཅད་ལ། །ཚོགས་མཆོད༴། །བསྐང་ངོ་བསྐལ་པའི་ཐུགས་དམ་བསྐང་། །ཉམས་ཆགས་ཐམས་ཅད་བསྐོང་གྱུར་ཅིག། །སྡིག་སྒྲིབ་ཐམས་ཅད་དག་གྱུར་ཅིག །འབྲས་བུ་སྐུ་གསུམ་ཐོབ་གྱུར་ཅིག། །མངོན་གྱུར་དབང་དང་དངོས་གྲུབ་སྩོལ། །ག་ཎ་ཙཀྲ་པཱུ་ཛ་ཁཱཧི།

༈ མགོན་པོའི་ཚོགས་བསྡུས་ནི། ཨོཾ་ཨཱཿཧཱུྃ་ཧོཿ མགོན་པོའི་ལྷ་ཚོགས་ཚོགས་ལ་སྤྱན་འདྲེན་གཤེགས། །ཕྱི་ནང་གསང་བ་བདེ་ཆེན་ཚོགས་མཆོད་འབུལ། །དམ་ཚིག་ཉམས་ཆག་ཐམས་ཅད་མཐོལ་ལོ་བཤགས། །གཉིས་འཛིན་དགྲ་བགེགས་ཆོས་ཀྱི་དབྱིངས་སུ་སྒྲོལ། །མཉམ་ཉིད་བདེ་བ་ཆེན་པོར་ཐུགས་དམ་བསྐང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། _{།ཅེས་པའང་མཁྱེན་བརྩེས་སོ། །དེ་ནས་བཤགས་པ་ནི།} མཧཱ་ཀཱ་ལ་གསན་ཅིང་དགོངས་སུ་གསོལ། །ནག་པོ་ཆེན་པོའི་དཀྱིལ་འཁོར་སྒོར་ཞུགས་ནས། །བཀའ་ཡི་དམ་ཚིག་གཉན་པོ་བསྲུང་རྒྱུ་ལ། །བཀའ་ལྟར་མ་གྱུར་གཞུང་བཞིན་རྔོ་མ་ཐོགས། །བསྙེན་སྒྲུབ་དུས་འདས་ཕུད་དང་གཏོར་མ་ཆག །རྩ་བ་ཡན་ལག་དམ་ཚིག་ཉམས་པ་ཀུན། །རྡོ་རྗེ་སྲིན་པོ་འཁོར་དང་བཅས་ལ་བཤགས།།