བློ་གྲོས་ཚེ་རིང་།

2023

བློ་གྲོས་ཚེ་རིང་།

༉ སྲིད་དོན་མཁས་པ་དང་དྲུང་འཚོ་ཅིགཨིན་མི་ བློ་གློས་ཚེ་རིང་མཆོག་སྤྱི་ལོ་ ༡༩༦༩ སྤྱི་ཟླ་ ༥ པའི་སྤྱི་ཚེས་ ༡༠ ལུ་འཁྲུངས་ནུག། ཁོ་གིས་སྤྱི་ལོ་ ༢༠༡༨ སྤྱི་ཟླ་ ༡༡ པའི་སྤྱི་ཚེས་ ༧ ལས་འབྲུག་གི་བློན་ཆེན་གྱི་གོ་གནས་བཞེས་ཡོདཔ་དང་ སྤྱི་ལོ་ ༢༠༡༨ སྤྱི་ཟླ་ ༥ པའི་སྤྱི་ཚེས་ ༡༤ ལས་ འབྲུག་མཉམ་རུབ་ཚོགས་པའི་སྲིད་འཛིན་འབད་ཡང་ཕྱག་ཞུ་ཡོདཔ་ཨིན།

སྐུ་ན་ཆུང་ཀུའི་བསྒང་གི་ལོ་རྒྱུས་དང་ཤེས་ཡོན་གྱི་སྐོར།

བློ་གྲོས་ཚེ་རིང་མཆོག་ ཐིམ་ཕུག་རྫོང་ཁག་ སྨད་ཝང་རྒེད་འོག་ གཡུས་དར་ལུང་ཁ་ལུ་སྐུ་འཁྲུངས་ནུག། ཁོ་གིས་གཞི་རིམ་གྱི་ཤེས་ཡོན་འདི་ སྤུ་ན་ཁ་སློབ་གྲྭ་ཆེ་བ་ལས་ལྷབ་ཡོདཔ་དང་ སློབ་རིམ་ ༡༢ པ་འདི་ ཤེས་རབ་རྩེ་མཐོ་རིམ་སློབ་གྲྭ་ལས་ མཇུག་བསྡུ་ནུག། མཐོ་རིམ་ཤེས་ཡོན་འདི་ སྤྱི་ལོ་ ༢༠༠༡ ལུ་ བྷང་ལ་དེཤ་རྒྱལ་ཁབ་ཀྱི་ཌ་ཀ་གཙུགལག་སློབ་གྲྭ་གི་མའེ་མེན་སིང་གསོ་རིག་མཐོ་རིམ་སློབ་གྲྭ་ནང་ལས་ སྨན་དང་བཤག་བཅོས་གཙུག་ལག་ཞི་རིམ་ཤེས་ཡོན་སྦྱང་གནང་ནུག། ཁོ་གིས་གཙུག་ལག་འོག་མའི་ཤེས་ཡོན་འདི་ བྷལ་ལ་དེཤ་གི་རྒྱལ་ས་ཌ་ཀ་ལུ་ཡོད་པའི་བང་ག་བཱན་དུ་ཤིཀ་མུ་ཇིབ་གསོ་རིག་གཙུག་ལག་སློབ་གྲྭ་ལས་ བཤག་བཅོས་ཀྱི་ནང་ལུ་སྦྱང་ཡོདཔ་ཨིན། དེ་ལས་ སྤྱི་ལོ་ ༢༠༠༧ ལུ་ འཛམ་གླིང་གསོ་བའི་ལས་ཚོགས་ཀྱི་སློབ་གཉེར་གྲོགས་རམ་ཐོག་ ཨ་མི་རི་ཀའི་ཝིསི་ཀཱོན་སིན་གསོ་རིག་གཙུག་ལག་སློབ་གྲྭ་ལས་ ཆུ་བརྟག་རིག་པའི་ནང་མཁས་པ་སྦྱང་གནང་ནུག། ཁོ་གིས་གཙུག་ལག་གོང་མའི་ཤེས་ཡོན་འདི་ སྤྱི་ལོ་ ༢༠༡༤ ལུ་ ཨསི་ཊ་ལི་ཡ་གི་ཀེན་བི་ར་གཙུག་ལག་སློབ་གྲྭ་ནང་ལས་ ཚོང་འབྲེལ་བདག་སྐྱོང་གི་ནང་ལུ་སྦྱང་གནང་ཡོདཔ་ཨིན།

སྒེར་གྱི་མི་ཚེ།

བློ་གྲོས་ཚེ་རིང་མཆོག་ དྲུང་འཚོ་ཨོ་རྒྱན་སྒྲོམ་མ་དང་གཉེན་བསྡོམས་ཏེ་ཡོདཔ་དང་ ཁོང་གིས་ལུ་ཨ་ལུ་བུམོ་གཉིས་ཡོདཔ་ཨིན་པས། ཁོ་གིས་ མོང་སྒར་ལུང་ཕྱོགས་སྨན་ཁང་ནང་ཕྱག་ཞུ་བའི་སྐབས་ བུ་གཅིག་དང་བུམོ་གཅིག་བུ་ཚབ་སྦེ་གསོ་ཡོདཔ་དང་ ཁོ་གིས་ རྫོང་ཁ་དང་ ལྷོ་མཚམས་ཁ་ ཨིང་སྐད་དང་བྷེང་ག་ལི་གི་ཁ་སྐད་ཚུ་བརྩིས་ཏེ་ ཁ་སྐད་ལེ་ཤ་སླབ་ཚུགསཔ་ཨིན།

ཁྱད་རིག་གི་གཡོག་གི་མདུན་ལམ།

བློ་གྲོས་ཚེ་རིང་མཆོག་གིས་ འཇིགས་མེད་རྡོ་རྗེ་དབང་ཕྱུག་གཙོ་བསྟེན་སྨན་ཁང་དང་ མོང་སྒར་ལུང་ཕྱོགས་གཙོ་བསྟེན་སྨན་ཁང་ནང་ལུ་ བཤག་བཅོས་གློས་སྟོན་པ་སྦེ་ཕྱག་ཞུ་ཡོདཔ་དང་ ལོ་ངོ་ ༡༡ གི་རིང་ལུ་ འཇིག་མེད་རྡོ་རྗེ་དབང་ཕྱུག་གཙོ་བསྟེན་སྨན་ཁང་ནང་ ཆུ་བརྟག་རིག་པའི་མཁས་མཆོག་སྦེ་ཕྱག་ཞུ་ནུག། དེ་ལས་ སྤྱི་ལོ་ ༢༠༡༣ ལུ་ རྒྱལ་གཞུང་ཞི་གཡོག་ལྷན་ཚོགས་ལུ་ དངུལ་ཀྲམ་ས་ཡ་ ༦.༢ སྤྲོད་དེ་སྲིད་དོན་ནང་ལུ་ བཅའ་མར་གཏོགས་ནུག།

སྲིད་དོན་དང་འབྲེལ་བའི་གཡོག་གི་མདུན་ལམ།

བློ་གྲོས་ཚེ་རིང་མཆོག་གིས་ སྤྱི་ལོ་ ༢༠༡༣ ལུ་ རྒྱལ་ཡོངས་ཚོགས་སྡེ་གི་བཙག་འཐུ་ནང་བཅའ་མར་གཏོགས་ཡོད་རུང་ འགོ་ཐོག་བཙག་འཐུ་ནང་ལས་ར་ཐོན་ཡར་སོ་ནུག། སྤྱི་ལོ་ ༢༠༡༨ ལུ་ བློ་གྲོས་ཚེ་རིང་མཆོག་གིས་ ཚོགས་རྒྱན་ ༡༡༥༥ ཐོབ་སྟེ་ འབྲུག་མཉམ་རུབ་ཚོགས་པའི་སྲིད་འཛིན་སྦེ་བཙག་འཐུ་གྲུབ་ནུག། དེ་ལས་ སྤྱི་ལོ་ ༢༠༡༨ ཀྱི་འབྲུག་གི་རྒྱལ་ཡོངས་ཚོགས་འདུ་གི་བཙག་འཐུ་ནང་ འབྲུག་མཉམ་རུབ་ཚོགས་པའི་ལྷོ་ཐིམ་ཕུག་འདེམས་ཁོངས་ནང་ལས་རྒྱལ་ཁ་ཐོབ་ནུག། ཁོ་གིས་ ཚོགས་རྒྱན་ ༣༦༦༢ ཐོབ་སྟེ་ འབྲུག་ཕུན་སུམ་ཚོགས་པའི་འདེམས་ངོ་ ཀུན་ལེགས་ཚེ་རིང་ཕམ་བཏང་སྟེ་ཡོདཔ་ཨིན། སྤྱི་ལོ་ ༢༠༡༨ ཀྱི་བཙག་འཐུ་ནང་ ཁོ་གི་སྲིད་ཚོགས་ཀྱིས་ འབྲུག་གི་རྒྱལ་ཡོངས་ཚོགས་འདུ་ནང་ འདེམས་ཁྲི་མང་ཤོས་ཐོབ་སྟེ་ ཁོ་བློན་ཆེན་གྱི་གོ་གནས་ཁར་འཕེབས་ཡོདཔ་ཨིན།

བློན་ཆེན་གྱི་གོ་གནས་བཞེས་ཡོད་པའི་སྐོར།

ཁོ་གིས་ སྤྱི་ལོ་ ༢༠༡༨ སྤྱི་ཟླ་ ༡༡ པའི་སྤྱི་ཚེས་ ༧ ལུ་ བཙག་འཐུ་ལས་གྲུབ་པའི་བློན་ཆེན་གསུམ་པའི་ཁྲི་ཐོག་ལུ་བྱོན་ནུག། དེ་ལས་ སྤྱི་ལོ་ ༢༠༡༨ སྤྱི་ཟླ་ ༡༨ པའི་སྤྱི་ཚེས་ ༢༧ ལུ་ རྒྱ་གར་རྒྱལ་ཁབ་ནང་ཉིན་གྲངས་གསུམ་གྱི་ལྟ་སྐོར་ལུ་བྱོན་ཡོདཔ་དང་ སྤྱི་ལོ་ ༢༠༡༩ སྤྱི་ཟླ་ ༤ པའི་སྤྱི་ཚེས་ ༡༣ ལུ་དང་ སྤྱི་ལོ་ ༢༠༢༡ སྤྱི་ཟླ་ ༣ པའི་སྤྱི་ཚེས་ ༢༤ ལུ་ བྷང་ལ་དེཤ་ལུ་གཞུང་འབྲེལ་གཟིགས་སྐོར་དང་ བྷང་ལ་དེཤ་གིརྒྱལ་ཁབ་རང་དབང་ཐོབ་སྟེ་མི་ལོ་ ༥༠ འཁོར་བའི་དུས་སྟོན་ནང་ མི་དབང་མངའ་བདག་རིན་པོ་ཆེ་གི་སྐུ་ཚབས་སྦེ་བྱོན་ཡོདཔ་ཨིན།

གཟེངས་བསྟོད།

• སྤྱི་ལོ་ ༡༩༩༡ ལུ་ ཤེས་རབ་རྩེ་མཐོ་རིམ་སློབ་གྲྭ་ལས་ ཝི་ལི་ཡམ་མེ་ཀི་ (Father William Mackey) གི་ཤེས་ཡོན་དྲག་ཤོས་ཀྱི་གསེར་གྱི་རྟགས་མ་ཐོབ་ནུག།
• སྤྱི་ལོ་ ༢༠༠༥ ལུ་ ཏཱ་ལའི་བླ་མ་སྐུ་ཕྲེང་ ༡༤ པ་མཆོག་ལས་ “the Unsung Hero of Compassion” ཟེར་མི་གཟེངས་རྟགས་འདི་ཐོབ་ནུག།
• སྤྱི་ལོ་ ༢༠༡༧ ལུ་ མི་དབང་མངའ་བདག་རིན་པོ་ཆེ་གི་ཞབས་ལས་ འབྲུག་ཐུགས་སྲས་ཀྱི་རྟགས་མ་ཐོབ་ནུག།
• སྤྱི་ལོ་ ༢༠༢༠ ལུ་ མི་དབང་མངའ་བདག་རིན་པོ་ཆེའི་ཞབས་ལས་ ན་བཟའ་ལུང་དམརམོ་གི་གཟེངས་བསྟོད་ཐོབ་ནུག།

ཁུངས་གཏུག།

1. Wikipedia contributors. (2021). Lotay Tshering. In Wikipedia, The Free Encyclopedia. Retrieved from https://en.wikipedia.org/w/index.php?title=Lotay_Tshering&oldid=1062701014