བདེ་བ་ཅན་གྱི་སྨོན་ལམ་བསྡུས་པ་ནི།

ཨེ་མ་ཧོཿ ངོ་མཚར་སངས་རྒྱས་སྣང་བ་མཐའ་ཡས་དང༌། །གཡས་སུ་ཇོ་བོ་ཐུགས་རྗེ་ཆེན་པོ་དང༌། །གཡོན་དུ་སེམས་དཔའ་མཐུ་ཆེན་ཐོབ་རྣམས་ལ། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །བདེ་སྐྱིད་ངོ་མཚར་དཔག་ཏུ་མེད་པ་ཡི། །བདེ་བ་ཅན་ཞེས་བྱ་བའི་ཞིང་ཁམས་དེར། །བདག་གཞན་འདི་ནས་ཚེ་འཕོས་གྱུར་མ་ཐག །སྐྱེ་བ་གཞན་གྱིས་བར་མ་ཆོད་པ་རུ། །དེ་རུ་སྐྱེས་ནས་སྣང་མཐའི་ཞལ་མཐོང་ཤོག །དེ་སྐད་བདག་གིས་སྨོན་ལམ་བཏབ་པ་འདི། །ཕྱོགས་བཅུ་སངས་རྒྱས་བྱང་སེམས་ཐམས་ཅད་ཀྱིས། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ། །ཏདྱཐཱ། པཉྩ་དྲི་ཡ་ཨ་ཝ་བོ་དྷ་ནཱ་ཡ་སྭཱ་ཧཱ། གནམ་ཆོས་བདེ་ཆེན་ཞིང་སྒྲུབ་ནས་ཁོལ་དུ་ཕྱུངས་པའོ།། ཕྱོགས་དུས་རྒྱལ་བ་སྲས་བཅས་དགོངས། །ཚོགས་གཉིས་རྫོགས་ལ་རྗེས་ཡི་རང༌། །བདག་གིས་དུས་གསུམ་དགེ་བསགས་པ། །དཀོན་མཆོག་གསུམ་ལ་མཆོད་པ་འབུལ། །རྒྱལ་བའི་བསྟན་པ་འཕེལ་གྱུར་ཅིག །དགེ་བ་སེམས་ཅན་ཀུན་བསྔོ། །འགྲོ་ཀུན་སངས་རྒྱས་ཐོབ་གྱུར་ཅིག །དགེ་རྩ་ཐམས་ཅད་གཅིག་བསྡུས་ཏེ། །བདག་གི་རྒྱུ་ལ་སྨིན་གྱུར་ཅིག །སྒྲིབ་གཉིས་དག་ནས་ཚོགས་རྫོགས་ཏེ། །ཚེ་རིང་ནད་མེད་ཉམས་རྟོགས་འཕེལ། །ཚེ་འདིར་ས་བཅུ་ནོན་གྱུར་ཅིག །ནམ་ཞིག་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་གྱུར་ཅིག །སྐྱེས་ནས་པདྨའི་ཁ་ཕྱེ་སྟེ། །ལུས་རྟེན་དེ་ལ་སངས་རྒྱས་ཤོག །བྱང་ཆུབ་ཐོབ་ནས་ཇི་སྲིད་དུ། །སྤྲུལ་པས་འགྲོ་བ་འདྲེན་པར་ཤོག ། སངས་རྒྱས་སྐུ་གསུམ་བརྙེས་པའི་བྱིན་རླབས་དང༌། །ཆོས་ཉིད་མི་འགྱུར་བདེན་པའི་བྱིན་རླབས་དང༌། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་ལྟར་བསྔོས་བཞིན་སྨོན་ལམ་འགྲུབ་པར་ཤོག །