ويكيبيديا:اسئله متكرره
اسئله متكرره هى مجموعه من الاسئله بتتكرر عن ويكيبيديا مصرى, و اجاباتها.
- لو عندك اى ملاحظه او تعليق على الاسئله المتكرره, ناقشها فى صفحة المناقشه
اسئله عامه
يعنى ايه ويكيبيديا مصرى؟
ويكيبيديا هو مشروع موسوعه حره ومحايده ومجانيه للناس كلها, و مفتوحه لـ أى حد يساهم فى تحريرها او يكتب او يعدّل فيها على الانترنت حسب معايير و طرق معينه. لحد دلوقتى فيه اكتر من 265 ويكيبيديا مكتوبين بـ 265 لغه. كلمة ويكيبيديا متكونه من كلمتين: الاولانيه ”ويكى“ (معناها الكتابه و التحرير بالطريقه دى, و ان المحررين يقدرو يعدّلو نصوص بعض), و التانيه ”انسيكلوبيديا“ (كلمه من أصل لاتينى معناها ”موسوعه“).
النسخه المصريه ”ويكيپيديا مصرى“ ابتدت كمشروع فى ابريل/برمودا 2008, و كل اللى بيساهمو فيها بيكتبو باللغه المصريه الجديده اللى بيتكلمها المصريين و بتتكتب بالحروف العربى.
ايه هى اللغه المصرى؟
- اللغه المصريه الحديثه هى اول لغه بيتعلمها المصريين من ابهاتهم و امهاتهم قبل ما يوصلو سن الخمس سنين و ما بيحتاجوش دروس فى قواعدها ولا فى صرفها ولا نحوها لإنها الاقرب ليهم من كل اللغات.
- اللغه المصريه الحديثه هى لغه معترف بيها ”ايزو 639“. كود اللغه بالنسبه لقانون المنظمه الدوليه للتوحيد القياسى (ايزو 639), هو arz, لغه مش لهجه.
هو المصرى مش لهجه من لهجات العربى؟
لحد الوقتى فيه خلاف على اجابة السؤال ده.
عموماً, فيه علما لغه بيقولو ان الدراسه و البحس العلمى بيقول ان اللغه المصريه الحديثه ليها اصول لغويه و تاريخيه أبعد من اللغه العربى; بمعنى انها ما نتجتش او اتخلقت من العربى, لكنها كانت فى الأساس نتاج تفاعل المصريين اللى كانو بيتكلمو قبطى مع دخول العرب أرض مصر فى القرن السابع الميلادى.
حتى لو كانت اللغه المصرى معتبره لهجه, سياسية و شروط مؤسسة ويكيميديا بتسمح بإن يتعمل مشاريع ويكيبيديا بلهجات, طول ما فيه يوزرات متحمسين للمشروع و حيساعد على نشر المعرفه اكتر. فيه ويكيبيديات كتير بلهجات او بطريقة كتابة مختلفه لنفس اللغه. فيه حتى ويكيبيديا انجليزى متبسط, يعنى فيه موسوعتين لـ لغه واحده.
ليه بالمصرى مش بالعربى؟
الدعوه للكتابه بالمصرى و جعلها اللغه القوميه فى مصر عمرها اكتر من ميت سنه. ويكيبيديا عربى موجوده علشان توفر المعلومات بالعربى الفصيح لكن المصرى مش لهجه, دى لغة اكتر من 70 مليون شخص فى مصر و غيرها من البلاد. مفردات و قواعد اللغه المصرى مختلفه عن العربى الفصيح. ويكيبيديا مصرى موجوده علشان توفر المعلومات للمتكلمين بالمصرى.
ليه بالمصرى مش بالصعيدى او الفلاحى او البورسعيدى او الاسكندرانى؟
- ويكيبيديا مصرى مكتوبه باللغه المصرى بطريقه اى مصرى يعرف يقراها.
- اللغه الصعيدى هى لغه نسخه محكيه معترف بيها ايزو 639 بردو. كود اللغه الصعيدى بالنسبه لقانون المنظمه الدوليه للتوحيد القياسى (ايزو 639), هو aec.
- الفلاحى او البورسعيدى او الاسكندرانى هما لهجات مصريه لللغه المصريه الحديثه.
- اما بتتوحد اللغه فى اى بلد, بتتوحد على اساس الطريقه المنتشره, اللى بتبقى موجوده فى المركز الثقافى بتاعها, و الطريقه المشهوره و اللى ليها پريستيچ.
ينفع يتكتب كلام علمى بالمصرى؟
- المصرى زى اى لغه حيّه بتتطور كل يوم و تطورها نابع من الناس.
- فيه شعرا و اُدبا كتير كتبو باللغه المصرى, زى صلاح جاهين, بيرم التونسى, محمد حسنين هيكل, عمر بطيشه, و احمد فؤاد نجم. مثلاً على اسم مصر.
- اساتذه الكيميا و الفيزيا و الجيولويجا فى كل مدارس مصر من شمالها لجنوبها ما بيشرحوش العلوم الا باللغه المصريه لإن هى دى الاسرع فى التواصل و الاسهل على لسانهم و الاقرب للوصول بالمعلومه العلميه لفهم الطالب.
- ويكيبيديا مصرى بتحاول تكتب المعلومات باللغه الاقرب للمصريين كلهم.
ازاى اكتب فى ويكيبيديا مصرى؟
- المقاله الرئيسيه: ويكيبيديا:طريقة الكتابه
اى حد ممكن يكتب فى ويكيبيديا مصرى اى حاجه يعرفها, فيه مجموعه من المبادئ العامه المفروض تتبعها و انت بتكتب. خد راحتك فى الكتابه طالما مش بتحيز. حاول تحط المصادر اللى جبت منها كلامك. اكتب, عدّل, ترجم, حوّل المقالات, بس ما تهينش حد. تقدر تساهم من-غير ما تسجل يوزر, بس الاحسن تسجل عشان مساهماتك تتسجل بإسمك, مش بـ رقم الIP. التسجيل مفتوح هنا
ليه تمصير الكلام؟
لما المصرى يتكلّم عن حاجه حديثه بيمصر الكلمه الاجنبى; مثلاً كلمة سييڤ الصفحة, كلمه جايه من ”save“ استعملت هنا لإنها مستعمله فى اللغه المصرى, و كلمة احفظ معناها ”افتكر“ زى ما يكون فى المذاكره, لو بيتكلم عن حاجه فى الكمبيوتر بيمصر الكلمه الاجنبى, زى الديسك و الدرايڤ و السكرين.
ازاى احمل الصور على ويكيبيديا؟
- الصور اغلبها متحمل على موقع اسمه كومونز لو رحت هناك و دورت على اى صوره ممكن تحطها هنا من غير اى مشاكل.
- حاول تحمل الصور على الكومونز احسن, و من هناك تقدر تستخدمها فى اى مشروع مش بس هنا.
- لو سمحت تحط ترخيص للصور, الترخيص هو خطوة بعد ملكية حقوق الصور.