فلسطين
الصفحه دى بتتطور. لو عندك أسئله, إكتبها فى صفحة المناقشه او صفحة مناقشة اللى بيطورها و اسمه بيظهر فى تاريخ الصفحه دى. |
فلسطين منطقه ججرافيه على الساحل الشرقى للبحر المتوسط والناحية الغربيه نهر أردن قايمه عليها دلوقتى دولة اسرائيل و منطقه بيعيش فيها عرب. تاريخياً، ماكانش ليها حدود معينه لحقبه طويله من الزمن ، لكن اتعارف على انها كانت دايماً بتشمل المنطقه الواقعه بين البحر المتوسط و نهر الاردن ، و كانت متاخمه لمصر من جهة الشرق. جغرافياً ، بتتكون من تلت مناطق هى 1. الغور ، و ده اقليم اخدودى بيشمل حوض نهر الاردن و البحر الميت. 2. هضبه واسعه فى شرقها سامره و فى جنوبها يهودا. 3. سهل ساحلى ضيق. المؤرخين العرب فى القرون الوسطى اعتبروا منطقة فلسطين جزء من الشام بتسكنها قبايل و كانت متقسمه على أعمال بتديرها الدول اللى كانت بتحكم شرق البحر المتوسط زى الدوله الايوبيه و الدوله المملوكيه. منطقة فلسطين بشكلها الجغرافى الحالى عمرها ماكانت فى التاريخ بلد أو دوله إلا مرتين، مره وقت مملكة بيت المقدس اللاتينيه و مره بعد تأسيس دولة اسرائيل.
عبر التاريخ شافت المنطقه دى حروب و معارك و صراعات كتيره بين امبراطوريات و ممالك و كانت ساحه مفتوحه للمعارك بين جيوش الامم . الصراعات القديمه فى عصور ماقبل الميلاد ما كانتش بسبب مقدسات و لا كان ليها ابعاد دينيه لكن كانت صراعات على السيطره على منطقة شرق البحر المتوسط. منطقة فلسطين فى حد ذاتها ما كانتش بلد و لا كان ليها اهميه كبيره بإستثناء انها ارض معارك عسكريه بتحارب الجيوش بعضها فيها ، عادة بين الجيوش الاسيويه اللى رايحه على مصر و جيش مصر اللى رايح على اسيا. تقريباً كل القوى اللى ظهرت فى الشرق الادنى سيطرت على منطقة فلسطين ، زى المصريين ، و الاشوريين ، و البابليين ، و الفرس ، و اسكندر الاكبر و خلفائه بطالمة مصر و السلوقيين ، و الرومان و البيزنطيين [1]. فى العصور الوسطى فضلت المنطقه دى تأدى دورها القديم كساحه للمعارك بين الامم وان خدت الصراعات ساعات شكل دينى و حصلت فيها معارك كبيره زى معركة حطين و معركة عين جالوت و غيرها و فضلت على الوضع ده لغاية ما قامت عليها دولة اسرائيل سنة 1948.
تاريخها
بعد ما طرد المصريين الهكسوس من مصر حوالى سنة 1567 ق.م [2] ، و طاردوهم و حاصروهم تلت سنين فى " شاروهين " جنب العريش فى سينا لغاية ما طردوهم بره حدود مصر الشرقيه فى منطقة فلسطين اللى بيعتقد انها كانت المكان اللى جم منه او اتجمعو فيه [3][4]، ابتدى المصريين من الزمن ده يتنبهوا لأهمية حماية مصر بره حدودها فى اسيا ، فبدأ عصر التوسع المصرى فى اسيا و ابتدت مصر تفرض سيطرتها على منطقة فلسطين و سوريا من عصر تحوتمس الاول ( 1525 - 1512 ق.م ) ، و فى عهد الملك تحوتمس التالت (1504 - 1450 ق.م ) وصل جيشها لغاية الفرات ، و اسس امبراطوريه مصريه واسعه بعد ما عدى فلسطين و خاض معركة مجيدو بنجاح حوالى سنة 1457 قبل الميلاد. الامبراطوريه المصريه كانت بتشمل مناطق فلسطين و سوريا اللى لما دخلها المصريين كانوا متقسمين سياسياً على امارات صغيره كتيره و ما كانتش فيه دوله محدده سايداها[5].
فى عهد الملك امنحوتب الرابع ( 1369 - 1354 ق.م ) انشغلت مصر بموضوع دينى-سياسى بعد ما امنحوتب عمل دين جديد و سمى نفسه اخناتون ، و ساب طيبه و راح على عاصمته الجديده اخت اتون (تل العمارنه) ، و دخل فى صراع مع كهنة امون. فى الفتره دى بدأت قوى جديده تظهر على مسرح الاحداث فى اسيا.
فهرست وملحوظات
مراجع و مصادر
- Herodotus , The Histories, Penguin Books, 1979 هيرودوت
- Sharpe, Samuel, The History of Egypt Under the Ptolemies, Edward Moxon, London 1838, Kessinger Publishing's Reprints, USA 2007, ISBN 1-4325-4859-X
- Toynbee, Arnold J. , Mankind and Mother Earth, Oxford University Press, 1976 ارنولد توينبى
- The New Encyclopædia Britannica, Macropædia, H.H. Berton Publisher,1973-1974
- The New Encyclopædia Britannica, Micropædia, H.H. Berton Publisher,1973-1974