董家渡聖方濟各·沙勿略堂

董家渡聖方濟各·沙勿略堂是1950年代以前天主教上海教區个主教座堂，勒拉上海市黃浦區董家渡路185號，是中國第一所能容納2000人个大型天主教堂。

1844年簽訂个中法《黃埔條約》規定天主教可以勒通商口岸公開傳教搭建造教堂。1847年11月21號，意大利傳教士羅伯濟主教主持了董家渡天主教江南代牧區主教座堂个奠基禮，到1853年4月4號聖枝主日正式開堂。該堂奉16世紀耶穌會派到東亞个第一個傳教士聖方濟各·沙勿略為主保。教堂个設計者是范廷佐神父，仿照羅馬耶穌會總會个聖依納爵大教堂建造，屬於巴羅克風格。教堂正立面有伯多祿搭保祿雕像。堂內幾根周長10米个巨柱，搭中國式樣个蓮花、仙鶴圖案，儕邪氣特別。堂前院內有三聖亭。

該堂周圍住勒上海頂早一批信奉天主教个教友，太平天國時期，交關以沙船業為生个教友遷至董家渡。1933年，該堂開始由中國籍神父管理，各堂口神父儕勒拉箇𡍲「避靜」、「歇夏」，年老个神父勒拉箇𡍲療養。

1966年，董家渡教堂畀關脫，「文革」期間，畀工廠當作倉庫占用。1982年衹歸還附屬房屋100平方米，因陋就簡恢復彌撒。1984年，恢復仔大堂个大部分，由李思德主教主持復堂大禮彌撒。2000年5月1號，大堂全部歸還，修繕後，9月17日由金魯賢主教主持復堂大禮彌撒。

1993年7月14號，董家渡天主教堂畀公布為上海市文物保護單位。

參見[編輯]