明治维新

日语表记
日语原文	明治维新
假名	めいじいしん
罗马字	Meiji Ishin

明治维新（日文：明治维新假名：めいじいしん）是日本勒1860年代末到1880年代辰光，以出自萨摩藩、长州藩等西南面地区个维新志士为核心个民族统一主义搭西化改革运动。明治维新个开始辰光一般畀认为是戊辰战争结束，一直持续到日俄战争日本胜利，成为列强个一员。当时辰光该个改革运动叫御一新或者一新，后歇来个人拿该个当明治天皇辰光个运动，叫俚“明治维新”。

明治维新辰光，由“萨长土肥”藩士成立个新政权勒戊辰战争当中消灭德川幕府搭反抗者，搞版籍奉还，结束仔600几年长个武士封建制度，建立日本近世头一个统一个中央集权政府。政治浪，俚笃同过推行天皇亲政搭推行议会政治（合议）个精神，力图建立学西方三权分立个新式政府，争取轧进西方列强当中；经济浪推动财政统一，稳定幕府后期严重欠债个国家财政，还搞殖产兴业，学欧美个技术，搞工业化浪潮；社会浪提倡“文明开化”，大力发展教育等措施；对外关系浪，除脱推动废脱搭列强签个不平等条约，还积极开发虾夷地搭仔打进琉球，拿出交关强硬个姿态，帮后歇来日韩合并个发展积极铺路。

明治维新勒日本近代史浪是穷关键个角色，俚建立起稳固个中央政府搭新个社会体系，藩阀搭大资本家代替仔老早头武士统治个阶级政治，打下仔弗可逆个现代化基础，让日本快速发展，后歇来可以轧进世界强国，日本近代化从该歇辰光开始。