唐朝
唐朝(618年-907年)是中國歷史上一個朝代,是關隴集團个貴族李淵立在隋朝末年自家建立个。李淵就是唐高祖。從伊開始,共總經歷廿一位皇帝。定都長安,並設立東都洛陽、北都晉陽等陪都。唐帝國个歷史可以分成初唐、盛唐、中唐搭晚唐四個階段。立在安史之亂之前,唐朝因為執行類似封建个府兵制度,軍事實力強勁,對外擴張明顯。弗過立在安祿山引發个安史之亂之後,唐帝國立在中亞个霸權徹底喪失。之後个一百多年,唐朝皇帝面臨內外交困个威脅,國都長安多趟畀吐蕃帝國搭回鶻汗國攻陷。國力大為下降。
唐朝歷史可以分成數期。初唐辰光,唐高祖个兒子唐太宗發動玄武門之變,殺兄害弟,逼爺禪讓。唐太宗一手拿唐朝帶向盛世,國力慢慢較復甦,打敗強敵東突厥,唐太宗受尊天可汗,成就貞觀之治。唐高宗个皇后武則天來690年改國號為「周」,自立為帝,一腳到705年唐中宗因神龍革命復辟,再恢復著唐朝國號。唐玄宗即位後進入盛唐,開元時期唐玄宗革除前朝弊端,政治開明,威服四方,史稱開元盛世。到天寶時期,政治慢慢較變亂,755年爆發安史之亂,唐朝開始衰敗。中唐辰光,唐朝受到河朔三鎮、吐蕃个威脅、太監專權搭牛李黨爭等影響,雖有唐憲宗个元和中興、唐武宗个會昌中興搭唐宣宗个大中暫治,但必過儕朆根治唐朝个內憂外患。晚唐因為政治腐敗爆發唐末民變,其中黃巢之亂破壞著江南經濟,畀了唐朝最後一擊,導致全國性个藩鎮割據,皇室最後畀藩鎮朱全忠控制。渠逼牢唐昭宗遷都洛陽,並勒907年逼唐哀帝讓位,唐朝滅亡。朱全忠建國梁,進入五代十國時期。
有唐一朝來文化、政治、經濟等方面成就弗少。中國个四大發明當中有兩樣(火藥搭印刷術)來唐朝辰光出現。政治上實行三省六部制,同隋朝推行科舉制度。軍事制度前期採用府兵制,軍力強大,幾屆擊敗外族。後期麼出現仔節度使(藩鎮)个軍政制度,割據一方,到唐朝後期還出現四十八個藩鎮。唐朝是箇辰光世界上強國之首,讓南詔、吐蕃、新羅、渤海國搭日本等國家吸收借用其文化搭政治體制。唐朝个經濟富裕,到後期更加依賴江南賦稅。土地、鹽鐵搭賦稅制度隨著社會改變而改革,從均田制搭租庸調製變成兩稅制。唐朝文化兼容並包,接納各个民族搭宗教,進行交流融合。文學發展達到高峰,蠻多點唐詩留傳後世,箇辰光有詩仙李白、詩聖杜甫等等。並且有推行古文運動个韓愈。史書搭著傳奇(小說个前身)也非常結棍。由於吸收了西域特徵搭宗教色彩,唐朝个藝術搭前後朝代儕弗一樣,壁畫、雕刻、書法搭音樂儕蠻發達个。唐朝聲譽遠播海外,其歷史地位深重,到明清時代海外多稱中國人為「唐人」。