上海閒話

上海閒話
Záon-hè ghāe-ghó
母語戶蕩	中國大陸 臺灣  香港  美利堅合眾國  澳大利亞  加拿大  日本  英國
使用戶蕩	上海市搭交關境外華人區
族群	中國漢族-吳越人，老上海租界个外國人
幾許人講	約莫1000多萬（日期不詳）
語系	漢藏語系 漢語族 吳語 太湖片 蘇滬嘉小片 上海閒話
文字	漢字、拉丁字
官方地位
官方言話	嘸沒
管理機構	嘸沒
言話代碼
ISO 639-3	–
ISO 639-6	suji
語言學家列表	wuu-sha
Glottolog	None

用新派上海閒話講「維基百科，自由个百科全書」

上海閒話，國際音標：[z̥ɑ̃²² he̞⁵⁵ ɦe̞³³ ɦo²¹]，是吳語太湖片蘇滬嘉小片个一種閒話，貤是吳語裡向拉近代交關有影響力个一種語言。乃朝上海閒話撥推廣普通閒話擠占空間，外加上海人出生率下降，出國移民搭老老多个外地移民湧入，另外頂重要个是箇歇上海學堂里向弗容許講上海閒話，弄得來上海閒話垃拉上海使用率豪𢜶下降，傳承已經出現脫邪氣嚴重个危機哉。

狹義浪个上海閒話一般性指个是上海市區人講个閒話。

分布

上海閒話分布拉上海市區，包括黃浦、靜安、虹口、楊浦、徐匯、普陀以及上海郊區搭國外个交關多个場化。八十年代後，上海市中心拆遷加劇，交關上海人畀遷去郊區，故咾上海閒話箇歇開始望郊區擴散。必過市中心一眼場化因為外來人口个關係，實際丄已經變成功上海閒話个空白區哉。

歷史

上海閒話个基礎是松江片吳語，原生因為來拉海邊，發展交關慢，來北部吳語裡向算是頂滯後个一道里个。開埠仔，兩樣生个場化个移民特別是江浙吳語區移民出現勒箇𡍲塊，再加現代化个進程，上海地區吳語个面貌開始高速發展，搭老早底个吳語已經弗大一樣哉。上海閒話是適合近代語音个吳語，消滅脫大部分中古漢語遺留，擁有快速、明瞭个特點，音韻貤相當便當，相當於各地吳語个「頂大公約數」，曾經拉70年代前後成為長三角地區通用閒話。

演化

錢乃榮講上海閒話有四隻演化階段。

第一段

1853到1899年，箇段辰光大多數資料儕是西方語言學家寫成功个。

• /dz/韻消失脫
• 咸山攝鼻音落脫
• /n//ŋ/（前後鼻音）弗分
• 入聲全部併進/ʔ/
• 濁上歸去

第二段

1900到1939年辰光，就是「老派」。

• 雙唇擦音變成功唇齒音
• 軟顎音搭/n/顎化
• /uo/搭有點/ɔ/合併進/o/
• 咸山攝合口呼變成功/ø/
• /œʔ/搭/eʔ/併成/aʔ/，/ʌʔ/變成功/ɑʔ/

第三段

1940到1969年，「中派」。

• 氣聲發聲態落脫
• /f h v ɦ/分別更加叫明顯
• 高元音前頭/s z/併進/ɕ ʑ/
• 雷來蘭弗分
• /ie/韻慢慢叫併到/i/裡向
• /ɿ ʮ/合併
• /iəŋ//iŋ/合併
• /ioŋ//ioʔ/分割出/yəŋ//yɪʔ/
• /ɔʔ//iəʔ/分別併進/oʔ//iɪʔ/
• 陰上陰去合併

第四段

1970到1999，箇個階段結束就代表新派个開始。

• /dʑ/因為普化出現
• 有點人疑母變成功/ɦ/
• 普通閒話/f/影響到上海閒話本身讀/h ɦ/个字
• 瞎胡調个清化
• 咸山攝雙元音變單元音
• /ã//ɑ̃/弗分，鼻化也有辰光讀成鼻音/ŋ/
• /aʔ/搭/oʔ/併進/əʔ/，/iaʔ/併進/iɪʔ/
• /ioŋ//ioʔ/普化成/yŋ//yɪʔ/
• /e/有辰光普化成/ei/
• /ɤ/讀成[ɤɯ]
• /o//u/弗分

新新派

推廣普通話之後，上海閒話進入新个階段，實梗浪个音系因人而異。特徵譬如講清濁弗分、/ɦ//ʔ/落脫，音系豪𢜶往普通閒話靠近。

音韻

根據好考个資料，一般根據音韻浪个兩樣，拿上海閒話分成功老派、中派搭仔新派三種。

連讀變調

中派上海閒話

代碼	調式	單字調	二字調	三字調	四字調	五字調
1.	陰平式	53	55＋21	55＋33＋21	55＋33＋33＋21	55＋33＋33＋33＋21
5.	去聲式	34	33＋44[1]	33＋55＋21	33＋55＋33＋21	33＋55＋33＋33＋21
6.		23	22＋44	22＋55＋21	22＋55＋33＋21	22＋55＋33＋33＋21
7.	陰入式	55	33＋44	33＋55＋21	33＋55＋33＋21	33＋55＋33＋33＋21
8.	陽入式	12	11＋23	11＋22＋23	11＋22＋22＋23 22＋55＋33＋21	22＋55＋33＋33＋21

表記

在上海開埠个初期，出現着上海土音字。箇套系統是由美國傳教士高第丕發明个，起頭是用來到上海傳教。後首有人運用渠發明个土音字，出版着土音字版个《伊娑菩个比方》。乃朝澳大利亞國家圖書館有一本收藏在許。

詞彙

上海開埠仔，作為中國現代化个橋頭堡，接觸現代赤刮拉新个物事貤勒中國領先。埃个貤反映勒上海閒話里向。歸个辰光个上海閒話吸收仔交關外國詞彙，甚至形成所謂个「洋涇浜」英文。上海閒話本身貤造出交關新詞新語，乃末再擴散到吳語區搭中國別𡍲場化。

人稱代詞

老派上海閒話個人稱代詞是：

	第一人稱	第二人稱	第三人稱
單數	我 /ŋu13/	儂 /noŋ13/	渠（俗作佢、伊，下同） /ɦ̥i13/
複數	伲 /ȵi13/ 我伲 /ŋu13-11 ȵi13-55/	㑚 /nɑ13/	渠拉 /ɦ̥i13-11 lɑ13-55/

中派、新派上海閒話個人稱代詞是：

	第一人稱	第二人稱	第三人稱
單數	我 /ŋu23, ɦ̥u23/	儂 /noŋ23/	渠/ɦ̥i23/
複數	阿拉 /ᴀʔ5-33 lᴀ(ʔ)23-44/	㑚 /nᴀ23/	渠拉 /ɦ̥i23-22 lᴀ(ʔ)23-44/

• 第一人稱複數到「阿拉」个變化明顯是受寧波話个影響。
• 所有格通過拉代詞或名詞後添加「个」 /gəʔ/ 而構成。

指示代詞

	近指	遠指
老派	迭 /dieʔ13/	伊 /i53/
中派、新派	嗰 /gəʔ12/	埃 /ᴇ53/

外來詞

19世紀末20世紀初个辰光，因得仔常莊搭講外文个外國人接觸，上海言話吸收仔交交關關外來詞彙，通過音譯、意譯或者引申義咾啥形式拿伊用拉上海閒話里向。多个是英語，像「凡士林（vaseline）」、「水門汀（cement）」咾啥便勒英語翻過來个。雖則搿點外來詞弗少儕已經退出伊拉个歷史舞台哉，伊拉一定程度上影響或增加仔弗少上海閒話甚至普通言話里向个詞，有眼甚至撥普通言話吸收哉，譬如：高爾夫（golf）、啤酒（beer）、麥克風（microphone）、時髦（smart）咾啥个。

現狀

上海閒話搭別樣个漢語方言（語言）差弗多，儕處垃消亡過程里向。外來人口个湧入搭仔強行推廣講普通閒話，讓上海閒話來勒上海个市中心成為次等語言。搿个情況來勒郊區還要叫嚴重。外來人口聚集个閔行、寶山郊區，已經形成脫大片中原官話方言島。上海家長對於上海閒話貤嘸沒啥清醒認識，邪氣多家長，尤其是老年人，熱衷教伊拉後輩普通閒話，乃朝上海閒話來勒00后里向基本亨八冷打儕消失哉。語言發展方面，因得仔推廣講普通閒話，上海閒話造詞能力已經邪氣低，基本浪向儕是普通閒話借詞。

2013年，上海地鐵16號線搭更加新个郊區線路，還有交關公交車儕有得上海閒話報站聽。

2017年，iOS 11系統裡向增加仔上海閒話聽寫功能。

2021年，上海閒話電影《愛情神話》上映。

2022年，iOS 16系統裡向增加仔上海閒話TTS（語音轉文字）語音包「南南」。

2022年，動畫《陽光咖啡廳之新友紀》上海閒話版垃bilibili高頭開播。

2023年往後，各奇各式AI个發展迅速，電子化變得好較便當，網絡高頭貤有越來越多用上海閒話虛擬歌姬（Vocaloid）調教出个歌。

「滬語」

「滬語」是近來垃勒媒體裡向興趣个對上海市區話个名頭。

滬語愛好者根據語言學定義，認為滬語是一種獨立於中文个語言。

就賽過蘇州人覺著吳語就是指蘇州閒話一樣，上海市民覺著滬語就是上海閒話。當然，交關多个上海人對語言問題非常重視，有老些多社會團體搭機構多趟要求政府保護滬語。所以垃拉媒體當中，對使用「滬語」一詞並嘸沒啥个顧慮。

「優越感」

箇歇有眼外地人覺着上海人垃上海公共場合浪講上海閒話就是弗尊重、歧視外地人，搞得唻上海人弗敢對服務行業个人講自家母語。

別樣

• 嘉興閒話

外頭鏈接

• 吳語協會
• 上海語言文化資源網絡展示平台 檔案，存勒互聯網檔案館當中。（2017年2月15號）

維基共享資源里向尋得着搭該篇文章搭界个多媒體資源：

上海閒話