एतच्छ्रुत्वा वचनं...

गीतोपदेशः

सञ्जय उचाच -

एतच्छ्रुत्वा वचनं केशवस्य कृताञ्जलिर्वेपमानः किरीटी ।

नमस्कृत्वा भूय एवाह कृष्णं सगद्गदं भीतभीतः प्रणम्य ॥ ३५ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य पञ्चत्रिंशत्तमः(३५) श्लोकः ।

पदच्छेदः

एतत् शृत्वा वचनं केशवस्य कृताञ्जलिः वेपमानः किरीटी नमस्कृत्वा भूय एवा आह कृष्णं सगद्गदं भीतभीतः प्रणम्य ॥ ३५ ॥

अन्वयः

किरीटी केशवस्य एतत् वचनं श्रुत्वा कृताञ्जलिः वेपमानः भीतभीतः कृष्णं नमस्कृत्वा सगद्गदं भूयः एव प्रणम्य आह ।

पदार्थः

किरीटी = अर्जुनः

केशवस्य = श्रीकृष्णस्य

एतत् = इदम्

वचनम् = वाक्यम्

श्रुत्वा = आकर्ण्य

कृताञ्जलिः = मुकुलितकरः

वेपमानः = कम्पमानः

भीतभीतः = भयसहितः

कृष्णम् = श्रीकृष्णम्

नमस्कृत्वा = प्रणम्य

सगद्गदम् = निरुद्धकण्ठम्

भूयः एव = पुनरपि

प्रणम्य = नमस्कृत्वा

आह = उवाच ।

तात्पर्यम्

श्रीकृष्णस्य एतत् वाक्यं श्रुत्वा अर्जुनः मुकुलितकरः कम्पमानः भयसहितश्च सन् कृष्णं नमस्कृत्य गद्गदितकण्ठः पुनरपि प्रणम्य अवोचत् ।

सम्बद्धसम्पर्कतन्तुः

• भगवद्गीता (मूलश्लोकाः)
• भगवद्गीता