Dancehall

Dancehall is nen musikstyl uut Jamaika den as untstån is achterin de jåren 1970. Dat begün as ne wat uutekleydere versy van 'gewoane' roots reggae, dee dårvöär sou'n beaten de heyle twentig jår dervöär populäär eweasd had. Der wör ouk minder up esüngen mär meyr up 'etoasted'; ne ård ritmisk küeren, to vergelyken med räppen uut de hiphop. Vöäral Yellowman wör dår nen grouten in.

Vanaf de tachtiger jåren verdrüngen digitale instrumenten de klassike reggaebesetting voordan meyr, wårmed as dancehall behöyrlik anders begün to klingen as reggae. De riddims, de begeleidende musik der under, wörden voordan belangryker, un der untstünden verskillende klassikers wåras meyrere artisten hits med hadden. Byvöärbeald et Buzz Riddim hadden meyrere artisten nen hit med.

Vanaf de jåren '90 löät de dancehall et reggaegevööl voordan meyr lös. Gin nåpikken meyr of rechtuut rechtan rockbeats der under, mär en typisk dreeslagsritme: dree achtsten wårvan de eyrste beide punteerd un swår benådrükked. De teksten van de artisten wördden ouk voordan ruwer un meyr in jamaikaansk patois, in steade van jamaikaansk standaardengelsk.

In de westerse wearld sint Sean Paul un Shaggy wellicht de bekendste dancehall-artisten. Anderen med sukces in de europääske hitlysten sint Buju Banton, Lady Saw, Beenie Man, Shabba Ranks un Bounty Killer.