هرم ماسلو للاحتياجات الانسانيه

تدرج الحاجات الانسانية عند ماسلو, الحاجات الاساسيه لوجود الانسان اساسا تحت, كل ما تطلع فوق كل ما الانسان يحقق احسن و اكتر.

بالانجليزى

هرم ماسلو للاحتياجات الانسانية (انجليزى: Maslow's hierarchy of needs) هيا نظرية سيكولوجيه عملها ابراهام ماسلو و انتشرت لاول مرة فى سنة 1943 بعنوان "نظرية تحفيز الانسان" او "نظرية الدوافع الانسانية" "A Theory of Human Motivation" و بعدين طور نظريته اكتر و خلصها و نشر نظريته كامله فى سنة 1954 فى كتاب بعنوان "التحفيز و الشخصيه" او "الدوافع والشخصية" Motivation and Personality ماسلو شاف ان الانسان بيتصرف بسبب وجود قوة جواه بتدفعه انه يتصرف التصرفات اللى بيتصرفها، وان القوة دى اللى بتدفع او بتزق الانسان وتخليه يتصرف ناتجة عن ميله الدائم انه يوفى ويشبع احتياجاته عشان يحس بالراحة، ويبعد نفسه عن الوجع الجسمى والنفسى اللى بييجى من الحرمان

وماسلو قسم الاحتياجات دى لـ 5 انواع من الاحتياجات سماها: الفسيولوجية والسلامة و(الانتماء والحب)، والاحترام (سواء احترام الناس التانيين للانسان او احترامه هو لنفسه)، وتحقيق الذات والرغبة الدايمة فى التحسين والتفوق على النفس واضافة حاجة جديدة كويسة للدنيا،

ماسلو عمل ترتيب للاحتياجات دى حسب أولويتها فى مراحل نمو الشخصية من اول الولادة والرضاعة ولحد بداية النضج وبعدين النضج اللى فوق النضج

وبيشوف ماسلو ان من الـ 5 انواع بيعتبر ان فيه احتياجات 4 اساسية جدا بيسميهم حاجات النقص "deficiency needs" الفيسيولوجية والأمان والانتماء والاحترام،،،ـ واذا كان النقص او الحرمان من الحاجات الفيسيولوجية زى الاكل والشرب والدفا والتبول، بيبان على الانسان بوضوح، فالنقص او الحرمان من الحاجات التلاتة اللى بعدها: (الامان والانتماء والاحترام)؛ مابيكونش ظاهر على الانسان ولكنه بيحس جواه بالقلق والتوتر والشد وقلة الراحة ودا بيخليه يحاول يعمل الحاجة اللى يحس انها هاتريحه

وماسلو بيشوف ان الانسان لازم يشبع الحاجات الاساسية عشان يبتدى يدور على الاحتياجات الاعلى منها ماسلو بيشوف ان الاحتياج اللى له الأولوية فى التأثير على سلوك البنى ادم مابيكونش هو الاحتياج الوحيد او الواحد فى اى مرحلة لكن بيشوف ان أكتر من احتياج بيأثر بس بيكون فيهم احتياج تأثيره أكتر من غيره

نظرية ماسلو بتقول ان الانسان محتاج يوفى ويشبع الاحتياجات الاساسية و بعدين يطمح انه يشبع الاحتياجات الاعلى و كده لحد مايشبع احتياجه لاحترام الناس له واحترامه لنفسه ... فيوصل لقمة الاحتياجات الانسانيه اللى هى تحقيق الذات فيشوف نفسه بيبدع ويبتكر؛ويضيف للحياة وللمجتمع وللانسانية حاجة كويسة جديدة ماحدش سبقه لها

ماسلو قسم الاحتياجات دى فى هرم طبقى من تحت لفوق بحيث الحاجات المادية والفسيولوجيةتحت فى اسفل الهرم، وتحقيق الذات فى قمته

ماسلو أضاف بعدين مجموعتين من الاحتياجات بين المستويين الرابع والخامس ، يعنى بين احتياجات الاحترام واحتياجات تحقيق الذات وهما:

• الحاجة المعرفية للمعرفة وللفهم
  • الحاجة الجمالية للنظام والتناسق والتماثل والجمال

بعد كده عملو هرم جديد لماسلو بيتكوين من ثمانية مستويات، وهى على الترتيب:

1. الإحتياجات الفسيولوجية والبيولوجية.
2. إحتياجات الأمان.
3. الإحتياجات الاجتماعية.
4. الحاجة للتقدير.
5. إحتياجات ادراكية.
6. إحتياجات جمالية.
7. إحتياجات تحقيق الذات.
8. إحتياجات التعالي.

مستويات الهرم

هرم ماسلو بيتكون من خمس مستويات للاحتياجات, من الاسفل الى الأعلى :

1. الفيسيولوجيه (المتعلقة بوظايف اعضاء الجسم )
2. السلامة والأمان
3. الحب والانتماء
4. الاحترام والتقدير
5. ادراك وتحقيق الذات. (الاحتياج الخامس: يسمى باحتياجات النمو)

الاحتياجات الفسيولوجيه

و هى الحاجات الاساسيه اللى بتحافظ على وجود الانسان و بتخاى اعضاء الجسم قادره تقوم بوظايفها.

• الحاجه ل التنفس
• الحاجه ل الاكل
• الحاجه ل الشرب
• الحاجه للتخلص من السموم و الفضلات يعنى التبول و التبرز
• الحاجه ل النوم
• الحاجه لدرجة حراره و درجة رطوبه تناسب الجسم بدون برد زايد او حر زايد وبدون جفاف زايد او رطوبة زايدة
• الحاجه ل المعاشره الزوجيه

احتياجات السلامه و الامان

و احدا من الاحتياجات الاساسييه التى بتحافظ على وجود الانسان

• السلامه الشخصيه
• سلامة ممتلكاته
• الامن الوظيفى
• الامن النفسى و المعنوى و العقلى
• امن الموارد
• سلامته الصحيه

الاحتياجات دى ملزمه عشان يشعر الانسان بالامن و يقدر يعيش حياه طبيعيه و طيبه

الاحتياجات الاجتماعيه

بعد الحصول على الاحتياجات الفسيولوجيه و الامان, بتظهر الطبقه التالته و هى احتياجاته الاجتماعيه:

• الحصول على اسره
• صداقه و يكون بعض الصداقات.
• حب \ جواز

الاحتياجات دى طالعه من حاجة الانسان انه ينتمى و يحس انه مقبول وسط الناس, وانه يكون منضم لمجموعة اجتماعيه, كبيره زى النوادى و النقابات والأحزاب السياسية، او الصغيره زى العيله و الاصحاب و شريك حياته. فى حالة نقص الاحتياجات دى الانسان ممكن يبقى انطوائى و يبقى متوتر و قلقان على طول و يجيله اكتئاب و ميعرفش يفكر او يعيش بشكل طبيعى.

الحاجة للتقدير و الاحترام

يركز الانسان فى دى المرحلة بالحصول على مكانة اجتماعية محترمة, و أنه يشعر بأن التانيين يعاملوه بشكل جيد ويعتبروه جدير بالاحترام والتقدير, ويحتاج كمان أن يكون فى نظر نفسه شخصاً محترم ويتحلّى بمكارم الأخلاق وبالفضائل الحميدة و يبدأ بتناول الثقة فى نفسه ويشعر بالقوة و انه من الممكن أن يتحسن اكتر ويبدأ بتطوير تفكيره و تفكيره سيتحسن لو تجاوز دى المرحلة.

حاجات اضافية اضافها ماسلو بعد صياغة النظريه

• الاحتياجات المعرفية لما الانسان يبتدى يحس انه عاوز يعرف وعاوز يفهم
• الاحتياجات الجمالية لما يحس الانسان بضرورة النظاام والتناسق والتماثل والجمال

الحاجة لتحقيق الذات

اخر مرحلة و قمة هرم ماسلو للاحتياجات الانسانيه, ولما بتكون الشخصية استكملت تطورها ونموها ونضجها بيبتدى الانسان يحس انه عاوز يشوف نفسه بيبتكر وبيخلق وبيبدع؛ يعنى مثلا يطور الفكر والفلسفة او يعمل على تغيير نظام المجتمع ناحية الأجمل والأحسن والأعدل والأكتر انسانية، أويكتشف المعرفة الجديدة اللى ماحدش سبقه لها أويخترع التكنولوجيا الجديدة أوينظم الشعر اللى يبرز شخصيته هو دون تقليد أويكتب الحكايه والرواية والمسرح أويخرج افلام سيما ومسرحيات أويألف مزيكا اويرسم فنون تشكيلية،،، الى اخره من فنون الخلق والابداع والابتكار واللى بيها الانسان بيعبر عن تجربته هو الفريدة اللى بتشيل شخصيته ودوره فى حياة الانسانية وفى تطويرها وترقيتها الى الأرقى دايما

وللأسف الشديد ففى بعض المجتمعات اللى مابتحترمش حرية الانسان ومابتحترمش كرامته، بيفشل كثير من الناس فى اتمام اشباع الاحتياجات الاساسية ال 4 ونتيجة كدا مايقدرش الانسان المسكين من النوع دا يحس بأى احتياج لتحقيق ذاته حتى انه مابيخطرش على باله أن فيه ناس يهمها جدا تحقيق ذاتها ويمكن مايقدرش يفهم لما بعض الناس دى بتعرض نفسها للخطر لأنه مايعرفش الراحة الكبيرةالسعادة العالية لما يشبعوا احتياجاتهم لتحقيق ذاتهم لما مثلا يكتشفوا معرفة جديدة او فكرة جديدة ويوصلوها للناس لحد لوكان دا هايجلب عليهم غضب بعض الجهات وبعض السلطات اللى ممكن يعتدوا على حرياتهم وعلى حياتهم بسبب اعلانهم على الناس اكتشافاتهم و أفكارهم الجديدة

وزى اى نظرية لحد لو كانت صح مش شرط ان كل الناس تتبناها او توافق عليها، احيانا بتلقى النظرية اعتراضات بسبب عيوب موضوعية فى النظرية تستحق التنويه، وأحيان كتيرة بسبب اختلاف الخلفية المعرفية والخبراتية لكل انسان فمش كل واحد يقدر يفهم كل نظرية الفهم الصح، واحيان تالتة بسبب اختلاف المصالح، وأحيان رابعة بسبب الجمود العقائدي.

انتقادات

النظريه دى اتعرضت لشوية انتقدات, و كان ليهم شوية تعليقات على نظرية ماسلو و منها:

• ان النظريه حددت ترتيب معين للاحتيجات, و ان الناس ممكن يبقى ترتيب الاحتياجات دى مختلف زى الواحد ان هدفه يوصل لحاجة تحقيق الذات منغير ما يعدى او يهتم جامد بالحاجة الاجتماعيه, و اللى ممكن يبقى هدفه التانى لما يحقق ذاته.
• ان فيه ناس ممكن تصر على مرحلة معينه و تزيد فيها جامد و تهمل الاحتيجات التانيه.
• ان الواحد ممكن يحاول و يشبع اكتر من حاجة ليه فى نفس الوقت.
• ان النظريه محددتش بالظبط الحجم الاحتياجات اللى الانسان بيعوزها عشان ينقل للمرحلة و الاحتياج التانى.