ويكيپيديا:على

على ويكيپيديا

"تخيّل واحد لعالم فين كلا بنادم كيعيش فوق لأرض عندو أكصي ل مجموع لمعرفة لبشرية. هادشي لي كانديروه دابا [ف ويكيپيديا]." — دجيمي ويلز

ويكيپيديا واحد لموسوعة لي أي واحد يقدر يبدل فيها، لمئات ؤلا لألاف د نّاس ديجا ساهمو ف ويكيپيديا ب دّاريجة، و عشرات لملايين ف مجموع لويكيپيديات ب كتر من 320 لوغة.

لهدف د ويكيپيديا هوّا باش تفيد لقاريين ب لعبها ل دور ديال موسوعة مفتوحة و موتاحة ل جميع نّاس، لي فيها معارف من جميع لمجالات د لمعرفة د بنادم. لموسوعة مستاضفاها مؤسسة ويكيميديا، و كاتكوّن من مجموعة د صّفاحي مفتوحة ل تّبديل، لي فيها مقالات د لمحتوى، و تا صفاحي د لمعاونة، د شّرح، سكريپتات لي كيعاونو ف تحديد لمحتوى و شّكل، ؤ غيرهوم.

ويكيپيديا كاتّكتب بشكل تعاوني من طاراف متطوعين، و أي واحد عندو أنتيرنيت يقدر ينضمّ ليهوم، و يبدّل ف أي صفحة (كاينين ستيتناءَات ديال صفاحي لي تّبديل فيهوم محدود ف كتاتبيا لي مشهود ليهوم، باش مايكونش تخريب ف دوك صّفاحي). من نهار بدات ف 15 يناير 2001، ولّات ويكيپيديا أكبر موسوعة كاتّشاف ف لعالم، ب كتر من مليار زاير ف شّهر. ويكيپيديا كاتحتاوي على كتر من 59 مليون مقال ب كتر من 320 لوغة، منها كتر من 6000 مقال ب دّاريجة.

وخا بعض لمقالات د ويكيپيديا يقدرو مايبانوش ب جودة عالية ف لمقدار و لمضمون، يلا تعاونو بزاف د لكتاتبيا معا لوقت غادي يطورو لمحتوى و يصلحو ل بعضياتهوم لأخطاء، ؤ نّتيجة غادي تكون محتوى ب قيمة كبر من ليّ كانت ف لبدية، ؤ لي كاتّحسّن بشكل مداوم.