吴语

中国里头个吴语地区分布

吴语是汉藏语系汉语族里向个一种语言，主要由吴越民系使用。现在主要分布在乃朝中国个江苏南部、上海、浙江大部份、安徽南部份荡地、江西东北搭福建西北，还有分布在香港、美国旧金山许荡地讲吴语个移民当中；澳大利亚搭加拿大个吴语移民主要讲太湖吴语，欧洲（主要是意大利、西班牙、法国）个吴语移民一般通用东瓯片或者处州片吴语。

吴语个汉字发音搭現代汉语推板交关。用词搭语法也邪气有特色。譬如用吴语写个小说《海上花列传》，弗会得吴语个人士望弗懂渠写何物事。张爱玲女客人翻译带官话个，讲官话个人还有眼理解弗进。

历史

吴语历史邪气悠久，2500年前头个春秋时代，江南两个诸侯国——越国搭吴国个丄向人有可能用个便是楚国传过去个汉语地方言话，箇便是顶早个属于汉语族个「吴语」。还有一种讲法是标准个古吴语在箇朞之前便完全搭楚国传来个只在吴越丄向阶级用个汉语方言，反使得当时辰光本地土著居民话个是另外一套道道地地、属于侗台语系分支个古越语。

到著公元四世纪东晋辰光，「衣冠南渡」个北方人发现吴地方言搭中原闲话推板邪气大，全科无法相互了解。却情，北方优势政治地位个影响下底，北方古漢文明搭之南方古越文明相互交流，吴越地区之古越语逐步吸收爻大量古汉语个特征搭之词汇，搭之古代吴语推扳蛮多个现代吴语在以后慢慢然成型，海会古老个吴语特征反使保留在今朝个「閩語」里向，现代吳語个語音明顯好搭中古（隋唐）辰光个韻書（廣韻－切韻）建立對應關係，換之講，雖然吳語个歷史是南方漢語裡向頂頂長久个，形態倒弗好算頂古老个。

丁邦新、潘悟云、郑张尚芳咾啥学者对吴语搭闽语个密切关系做个详尽个分析，可以假设历史上是同源个。李如龙列出来个闽语一二级特征词，将近一半好算吴闽同源词。还有眼共有现象通常不见于别样汉语。

現狀

吳語在人口統計丄是乃朝中國大陸个第二大語言，弗過，因爲弗像閩南語搭粵語箇然有「統戰需要」，吳語目前有淪爲市井言話个危險，出現在媒體丄个正規新聞節目當中个頻率邪低。

吳語个內部狀況也是各式各樣，金華、衢州一眼場許个當地居民已經開始大規模放棄吳語哉。蘇南交關農村也因爲外來人口增多帶來著吳語放棄大趨勢。

吳語地區个教育相對發達。 幼稚園辰光就開始推廣普通話活動搭之學堂裏向用語个單一普化，導致爻新生代普遍雙語甚而至於發生爻母語替代，外加已經基本喪失脫吳語閱讀搭之寫作能力哉，在年紀輕个本地人當中出現行情衹會得聽弗會講、甚至全科弗會得聽貤弗會得講个人。

分佈

按照現在一般个學術丄个分區，吳語分佈在江蘇南部2000萬人、浙江大部分5000萬人，上海市全部2000萬人，安徽南部搭之1000萬人福建、江西个少部分場許，大約摸作，通行吳語个縣市有110個橫裡，人口大約一億零八百萬（2011年）。

但弗過，由於瑲朞吳語區年輕人大部分吳語水平蹩腳，交關三十歲朝下个年輕人甚至弗曉得講當地語言。蓋咾，吳語使用人口在拉迅速減少。爾儂可以望見來在家庭聚會个辰光，大人同大人講吳語，同自家伢兒講个辰光卻用普通話。

吳語分佈个四隻極：

• 頂北：江蘇如東東南部个幾隻鄉（使用啟海話）
• 頂東：浙江舟山群島
• 頂南：福建浦城縣（城關及以北，講屬於南部吳語个浦城閒話）
• 頂西：安徽石台縣（使用宣州片吳語，寔個最西點比較模糊而且在弗斷東移，因爲宣州吳語正在消亡當中） ，比較穩定个西端是江蘇省高淳縣。

分區

另見主條目「吳語分區」

语音

顶重要个特征就是是中古全浊声母情原保留浊声，譬方“冻”“痛”“洞”声母分别是[t]、[tʰ]、[d]。

核心吴语个浊塞音从初起浊声时间（VOT）来看，位于后字个辰光的的刮刮是浊声。位于前字个辰光通常不是严格意义上个浊声，少数学者因此描写个辰光索介拿全浊声母搭全清声母归併。但是两者听感差异还是蛮大个，严格来讲，核心吴语[d]是弛声，[t]是张声，搭北语[t]侪不一样。结合声学搭感知两方面看，吴语塞音鼎立还是存在个。

中古音类	前字		后字
	初浊	基频	初浊	持阻
全清“冻”	全清浊<次清	全浊<全次清	全浊<全清<次清	全浊<全清
次清“痛”	全清浊<次清	全浊<全次清	全浊<全清<次清	－
全浊“洞”	全清浊<次清	全浊<全次清	全浊<全清<次清	全浊<全清

詞彙特點

• 吳語有一批保持古音、古義个常用詞語。如「許」（指示代詞）、「汏」搭「滰」（洗）、「囥」（藏）、「隑」（斜靠）、「廿」（二十）、「鑊」（鍋）、 「弗」搭「勿」（不）。
• 第二、第三人稱代詞个詞根大多源自「汝/爾」、「渠（佢）/佗」。
• 單數人稱標記多由古江東方言个「儂」（人）演變過來。
• 複數人稱標記多樣化，多數可上溯到端系个同源形式[taʔ] 或[ti]（比較：粵語「哋」）。
• 表示定語搭領屬个結構助詞、常用个量詞搭陳述句語氣助詞同形，可上溯至見系个同源形式。

語法特點

• 吳語普遍具有普通話無个存在體，比如上海：佢（俗作「伊」）在門口頭立脫歇。 （他在門口站了一會儿。）
• 交關地方有兼表完成體跟持續體个助詞，形如[lʱ- h-]或其簡略體（約相當於普通話个「著」）。
• 有結果體，用「脫」、「落」、「掉」等表示，如蘇州：隻檯子壞脫哉。
• 話題句傍普通話佔優勢，如紹興：个隻電影我看過哉。
• 謂語動詞个修飾語常後置，如溫州：你走先，我就來。

正字法搭書面語

語氣助詞

吳語語氣助詞在語句意味个表達丄有邪氣重要个語法作用，語氣助詞豐富，用法複雜，各式各樣。語氣助詞在表達語氣搭情貌丄有得舉足輕重个作用，交關辰光是弗可或缺个。 以上海言話爲例，主要个語氣助詞有：

• 「嘚」（老派）、「唻」、「嘚唻」
• 疑問語氣助詞，如：「𠲎」、「啦」、「啊」、「勿啦」、「呢」、「呢啥」（老派）、「嚜」、「啘」、 「咾」、「吤」（“个啊”連音，句尾助詞「个」濁化）、「阿」（用於句首或句中，入聲）
• 命令語氣助詞，如：「嚡」、「好唻」（老派：「末哉」）
• 感歎語氣助詞，如：「嚡」、 「嘢」、「个嘢」、「哩」、「哇」、「嗗」
• 別个句末語氣助詞，如：「啊」、「嚜」、「喉」、「噢」、「个啦」、「啦哩」（老派）、「唩」

上海言話个語氣助詞在發展過程中越來越簡化，交關語氣助詞，比方「呢啥」、「啦哩」、「末哉」 在中新派群體裏勢已經弗用，但是在上海郊縣地區搭之臨近城市（如蘇州、嘉興、湖州等地）仍舊有弗同程度个保留。

方言

根據吳語語言特點搭通話情況，好搭渠分成是六片： 太湖片 台州片 東甌片 金衢片 上麗片 宣州片

文學作品及影響

另見主條目「吳語文學」

另見

• 代表方言：上海言話
• 代表方言：蘇州閒話（蘇白）
• 代表方言：江陰話
• 代表方言：杭州話語
• 代表方言：紹興話
• 代表方言：寧波言話
• 代表方言：台州話
• 代表方言：溫州話
• 錢乃榮

外部链接

• 吴语字典^{[链接坏脱]}
• 吴语协会
• 吴语协会·吳音小字典
• 吴语学堂

侬可以勒维基教科书里向寻搭箇篇文章有关个电子教程：

Wu Chinese