د امریکې صدر بايډن د نړیوال عدالت لخوا د اسرایل او حماس د مشرانو غوښتنه رد کړه

د امريکې صدر جوبايډن د زيارت/پنجشنبې په ورځ د جرمونو د نړيوال عدالت هغه غوښتنه رد کړه چې د غواړي د اسرايل وزيراعظم بينيامين نېتنياهو، د دفاع وزير ‏يوو ګېلانت او غزه کې د حماس د درېیو مشرانو د ګرفتارۍ حکمونه دې د جنګي جرمونو په تور جاري کړی شي.

سپينه ماڼۍ کې خبريالانو سره خبرو کې د صدر بايډن نه پوښتنه شوې، ايا د امریکا سره کوم ثبوت شته چې اسرايل د غزه په جګړه کې فلسطينيان وږي ‏ساتلي او د جنګي الې په توګه یې کارولي، څنګه چې روانه اوونۍ نړيوال عدالت تور لګولی وو؟

بايډن دغه پوښتنې ته نېغ ځواب نه دی ويلي، خو ويلي يې دي مونږ د نړيوال عدالت واک يا دايره اختيار په دې ډول نه منو څنګه چې کارول کيږي دا ساده ‏خبره ده.‏

بايډن د اوږدې مودې نه د اسرايل ملاتړ کوي، هغه د جګړې په يادولو سره وويل، مونږ نه ګڼو څه چې اسرايل کړي او څه چې حماس کړي هغه يو ډول دي.‏

د اسرايل او حماس ترمنځ د اووه مياشتو نه جګړه روانه ده. په غزه کې د صحت د وزارت ترمخه، په دې جګړه کې د 35,000 نه زيات فلسطينيان وژل شوي چې ‏پکې زياته شمېره د ښځو او ماشومانو ده.‏

اسرايل وايي، په جګړه کې 14,000 وسله وال او 16,000 ملکي خلک وژلي دي خو اسرايل په دغه اړه کوم شواهد نه دي وړاندې کړي.‏

په اووم اکتوبر په اسرایل د حماس په حمله کې د 1200 کسان وژل شوي او 250 نور کسان حماس یرغمال نیولي وو. امریکې، برطانیې او ځینو نورو ملکونو ‏حماس ترهګر تنظیم ګرځولی دی.‏

ملګري ملتونه، امریکا او د نړۍ ګڼ هيوادونه د جنګ بندۍ دپاره فشار اچوي، او د څو مياشتو راهسې د عارضي جنګ بندۍ دپاره خبرې د دواړو خواو ‏څخه د ځينې شرطونو په بنياد د ځنډ ښکار دي.‏

نړيوال عدالت د زيارت/ پنجشنبې په ورځ اعلان کړی په غزه کې د جنګ بندۍ د حکم جاري کولو په اړه د جنوبي افريقې په خواست به د جمعې په ورځ خپله ‏فېصله اوروي.‏

د مصر سره د غزې په سرحدي ښار رفح کې د اسرايل د تېرې اوونۍ د حملې وروسته جنوبي افريقې د نړيوال عدالت نه غوښتي وو چې د جنګ بندۍ دپاره ‏اقدامات وکړي.‏

جنوبي افريقې نړیوال عدالت ته په خواست کې دا هم ويلي وو، اسرايل ته دې د غزې څخه په بشپړه ډول ويستلو حکم ورکړي او د ملګرو ملتونو کارمندانو، ‏د بشري حقونو تنظيمونو او خبريالانو ته دې علاقې ته د رسايۍ اجازت ورکړي.‏

اسرايل د جنوبي افريقې تورونه ردوي او وايي د غزې په جګړه کې یې ملکي وګړي نه، بلکې حماس هدف دی چا چې د اووم اکتوبر حمله کړې وه.‏

‏(د دې خبر ځينې معلومات د اې پي، اې اېف پي او رويټرز څخه اخستل شوي)‏