Salvör fer ekki í framboð
Salvör Nordal, umboðsmaður barna hefur ákveðið að gefa ekki kost á sér til embættis forseta Íslands í komandi kosningum.
Hún tilkynnir þetta á Facebook-síðu sinni.
Gott gengi í Maskínukönnun
Salvör kveðst fyrst hafa velt fyrir sér hlutverki embættisins eftir að hafa tekið þátt í umræðum um efnið í stjórnlagaráði á sínum tíma.
Í kjölfarið skrifaði hún fræðigreinar um embættið sem valdtemprandi þátt í stjórnskipuninni og um þjóðaratkvæðagreiðslur.
Hún segist hafa fengið í gegnum árin hvatningu frá fjölmörgum um að bjóða sig fram og gaf sér umhugsunarfrest á síðustu vikum.
Þrátt fyrir gott gengi í könnun á vegum Maskínu komst Salvör að þeirri niðurstöðu að bjóða sig ekki fram.
36% jákvæðir í hennar garð
Samkvæmt Maskínukönnuninni sem var framkvæmd þann 6. til 12. mars þar sem fjórir mögulegir frambjóðendur voru bornir saman voru 36% þátttakenda jákvæðir í hennar garð.
Til samanburðar voru 32% jákvæðir í garð Höllu Tómasdóttur, 39% jákvæðir í garð Ólafs Jóhanns Ólafssonar, sem gefið hefur út að hann fari ekki fram og 49% jákvæð í garð Baldurs Þórhallssonar.
Mörg mikilvæg verkefni framundan
„Niðurstaðan er nú sem fyrr að bjóða mig ekki fram. Vissulega styttist í að ég ljúki tíma mínum sem umboðsmaður barna en þar eru fjölmörg mikilvæg verkefni framundan og einnig bíða ýmis hugðarefni tengd siðfræði, stjórnarskrármálum og lýðræði.
Ég þakka innilega hlýjar kveðjur og hvatningu á síðustu vikum. Þær munu verða mér mikilvæg hvatning á öðrum vettvangi,“ segir Salvör.