Pútín: „Þetta eru landráð!“
Vladimír Pútín, forseti Rússlands, ávarpar þjóð sína í dag.
AFP/Gavriil Grigorov
Vladimír Pútín, forseti Rússlands, ávarpaði þjóð sína fyrir skömmu í sjónvarpi í kjölfar uppreisnar Wagner-málaliðahópsins.
Kallaði forsetinn uppreisnina glæpsamlega ævintýraherferð og sagði hana tilraun til að grafa undan Rússlandi innan frá og að um væri að ræða hnífstungu í bak Rússlands og rússneskrar þjóðar.
„Þetta eru landráð!“
Gera afgerandi ráðstafanir í Rostov
Forsetinn sagði að áhersla yrði lögð á að gera afgerandi ráðstafanir til að koma á stöðugleika í borginni Rostov á Don í suðurhluta landsins, þar sem Jevgení Prigósjín, stofnandi Wagner-hópsins, segist hafa náð yfirráðum yfir öllum herstöðvum.
Pútín kallaði á samstöðu þjóðarinnar og talaði fallega um meðlimi Wagner-hópsins sem hafa barist og dáið við hlið rússneska hersins í Úkraínu.