R. B. Quliyevin Azərbaycan Respublikası Milli Məclisi deputatının səlahiyyətlərini itirməsi haqqında
AZƏRBAYCAN RESPUBLİKASI MİLLİ MƏCLİSİNİN QƏRARI
Azərbaycan Respublikasının Milli Məclisi Azərbaycan Respublikası Milli Məclisi İntizam komissiyasının deputat Rəsul Bayram oğlu Quliyevin deputat səlahiyyətlərini itirməsi barədə təklifini müzakirə edərək aşağıdakıları müəyyən etmişdir:
Deputat Rəsul Bayram oğlu Quliyev 1996-cı il sentyabrın 11-də Milli Məclisin növbədənkənar sessiyasında Milli Məclisin sədri vəzifəsindən istefaya getdikdən sonra bir il üç ay müddətində Milli Məclisin iclaslarında iştirak etmir. Bu vaxt ərzində deputat R. B. Quliyev Milli Məclisə iclasları buraxmasının səbəblərini izah edən heç bir sənəd təqdim etmədən Milli Məclisin 1996-cı ilin payız sessiyasında, 1997-ci ilin yaz və növbədənkənar sessiyalarında, habelə 1997-ci ilin payız sessiyasının əvvəlindən indiyə kimi keçirilmiş 80 iclasında üzrsüz səbəbdən iştirak etməmişdir. Bundan başqa həmin müddətdə deputat R. B. Quliyev özü haqqında, harada olduğu və nə ilə məşğul olduğu barədə Milli Məclisə heç bir məlumat verməmiş, seçiciləri ilə görüşməmiş və ümumiyyətlə Milli Məclislə əlaqəsini tam itirmişdir.
Azərbaycan Respublikasının Milli Məclisi yuxarıda göstərilənləri və Azərbaycan Respublikası Milli Məclisi İntizam komissiyasının R. B. Quliyevin deputat səlahiyyətlərini itirməsi barədə qənaətini nəzərə alaraq, habelə Azərbaycan Respublikası Konstitusiyasının 89-cu maddəsinin II hissəsinə, Azərbaycan Respublikası Milli Məclisi Daxili Nizamnaməsinin 23-cü maddəsinin birinci və üçüncü hissələrinə, 46-cı maddəsinin 5-ci bəndinə və 47-ci maddəsinin altıncı hissəsinə əsasən qərara alır:
Rəsul Bayram oğlu Quliyev Azərbaycan Respublikası Milli Məclisi deputatının səlahiyyətlərini itirmiş sayılsın.
Azərbaycan Respublikası Milli Məclisinin sədri
M. ƏLƏSGƏROV.
Bakı şəhəri, 16 dekabr 1997-ci il.
№ 413-I QR.