Atene ti Mabe nga na ti Akotara so Nzapa Ake

Nzapa ayeke pepe ti Li Ota

1. A yeke pepe atene ti mabe nga na ti akotara kue si ayeke sioni. Me Nzapa ayeda na ala pepe tongana a londo na lege ti vorongo ti wataka wala tongana a gue nde na afango ye ti Bible.—Matthieu 15:6.

2. Nzapa ti Li Ota: Jéhovah ayeke mbeni Nzapa ti Li Ota—azo ota na yâ Nzapa oko? Pepe! Jéhovah, Babâ ni, ayeke ‘oko tâ Nzapa.’ (Jean 17:3; Marc 12:29) Jésus ayeke kozo Molenge ti Lo, na Nzapa ayeke beli ti lo. (1 aCorinthien 11:3) Babâ ni ayeke kota mingi ahon Molenge ni. (Jean 14:28) Yingo ti nzoni-kue ayeke pepe mbeni zo; a yeke ngangu ti Nzapa so asala kusala.—Genèse 1:2; Kusala 2:18.

Noël na Pâques alondo na angbele lege ti vorongo ti wataka

Mbeni ye oko amu lege pepe ti voro akinda wala ti sala mbito ti ala

3. Noël na Pâques: A dü Jésus pepe na lango 25 ti nze ti décembre. A dü lo ndulu na lango 1 ti nze ti octobre, mbeni ngoi na yâ ti ngu so aberger abata akundu ti ala na gigi na bï. (Luc 2:8-12) Jésus ahunda lâ oko pepe na aChrétien ti sala matanga ti dungo lo. Nde na so, lo tene na adisciple ti lo ti dabe na kui ti lo. (Luc 22:19, 20) Noël na asalango ye so angoro ni alondo na angbele lege ti vorongo ti wataka. A yeke tâ tene nga teti aye so angoro Pâques, tongana salango kusala na apara-kondo nga na andaramba. Akozo Chrétien asala pepe matanga ti Noël wala ti Pâques, na laso atâ Chrétien nga asala ni pepe.

4. Amatanga ti Dungo Zo: Bible asala gi tene ti amatanga use ti dungo zo so azo so avoro Jéhovah pepe asala ni. (Genèse 40:20-22; Marc 6:21, 22, 24-27) Akozo Chrétien asala amatanga ti dungo zo pepe. Ngobo ti salango amatanga ti dungo zo alondo na angbele lege ti vorongo ti wataka. Atâ Chrétien amu amatabisi na asala ngia na popo ti ala na ambeni ngoi nde na yâ ti ngu.

5. Mbito ti Akinda: Akinda alingbi ti sala mbeni ye oko pepe wala ti hinga mbeni ye oko pepe. E lingbi ti mu maboko na ala pepe, na ala lingbi ti sala sioni na e pepe. (Psaume 146:4; Zo-ti-fa-tene 9:5, 10) Âme ayeke kui; a ngbâ na fini pepe na peko ti kuâ. (Ezéchiel 18:4) Me ngoi na ngoi a-ange ti sioni, so a di iri ti ala ayingo sioni, atene ala yeke ayingo ti azo so akui awe. Atene ti kotara kue so andu mbito ti akinda wala vorongo ala ayeke sioni.—Esaïe 8:19.

6. Croix: Jésus akui na ndo ti croix pepe. Lo kui na ndo ti mbeni yongoro keke. Tene ti yanga ti Grec so akiri pekoni na “croix” na yâ ti aBible mingi aye ti tene yongoro keke oko. Fä ti croix alondo na mbage ti angbele lege ti vorongo ti wataka. Akozo Chrétien asala kusala na croix wala avoro ni pepe. Tongaso, na lê ti mo a yeke na lege ni ti sala kusala na croix na yâ vorongo?—Deutéronome 7:26; 1 aCorinthien 10:14

7. A lingbi ti duti ngangu ye mingi ti zia ambeni tene ti mabe nga na ti akotara so. Azo ti sewa nga na andeko alingbi ti tara ti sala si mo yeda pepe ti gbian atene ti mabe ti mo. Me mungo ngia na bê ti Nzapa ayeke kota ye mingi ahon mungo ngia na bê ti azo.—aProverbe 29:25; Matthieu 10:36, 37.

Copyright © 2008 Watch Tower Bible and Tract Society of Pennsylvania. All rights reserved.