In Hamborg sünd verleden Johr achtunachtig Minschen dörch Drogen storven. So seggt dat een Antwuurt vun den Senaat op een Fraag vun de CDU. Binah dree Viddel vun de Doden weern Mannslüüd. In’n Snitt sünd se knapp dreeunverdig Johr old west. Blangen Heroin un Crack hebbt ok Behölpsmiddel as Methadon en Rull speelt, bi mehr as en Drüddel vun de Lüüd. An’n Hauptbohnhoff boot de Sozialbehöörd opstunns noch een Anloopsteed för Suchtsüüke ut.
Ok na den Schlagermove ünnersöcht de Polizei en rassistsch Vörfall. Ünnerdeß dat Leed „L’amour toujours“ vun Gigi D‘agistino lööp, schall en Grupp vun Fierlüüd dorto Parolen gegen Utlänners gröölt hebben. Wieldeß schall en Deel vun de Lüüd ok den Hitlergurß wiest hebben. En anner Vörfall is vun dat Elite-Internat Louisenlund künnig worden. De Schölers, de dor woll mitmakt hebbt, sünd för een Week op Urlaub schickt worden. Op Sylt ünnersöcht de Polizei middewiel wegen dree rassistsch Vörfäll tau Pingsten.
Dat Hobengeschäft twüschen den Senaat un de Reederee MSC ut de Schwiez, mit dat vele nich inverstahn sünd, geiht wieder vöran. Twee wichtig Utschüß vun de Börgerschopp holt vundag nocheens Ratslag över dat Geschäft, wohrschienlich to’t letzt Mol, vör de Afstimmen, wo dat denn wißwohrhaftig op an kümmt. Hüüt schüllt nich blots Vertreder ut den Senaat un Facklüüd ut de Wirtschopp mit bi sien, sünnern ok Hobenarbeiders, de to dat MSC-Geschäft klipp un klor Nee seggt. De Oppositschoon smitt den Senaat vör, dat he betto överhaupt noch nich all Ünnerlagen vörleggt hett.
De Luftslag vun Israel, wat en Quarteer vun Flüchtlinge in den Gazastriepen drapen hett, wobi tominnst fiefunveerdig Minschen to Dode kamen sünd, warrt vun vele Länners bekrittelt. De Ministerpresedent vun Israel Benjamin Netanjahu seggt, dat is en tragisch Fehler west un hett künnig makt, dat de Vörfall ünnersöcht warrt. Ok de Seekerheitsraat vun de UNO kümmt vundag to en Extra-Drepen tohoop. De Hamas-Terrortrupp will eerstmol nich mehr över en Wapenroh verhanneln; dat is ehr Reaktschoon op den Vörfall.
De Kastens för de Breefwahl an dat Raathuus in Altnaa sünd so anboogt, dat jedwereen de al insmeeten Stimmzeddels wedder ruthalen un klauen kann. Dat hett en Test dörch dat NDR-Hamborg-Journal vör Dag bröcht. Lannswahlleiter Oliver Rudolf seggt, de Wahl gellt likers. De Kastens schüllt blots poor Daag so free west sein. Normalerwies hebbt se en Schutz, dormit dor nix rutklaut warden kann, man de hett as dat utsüht nich funktschenert. Bet hüüt Meddag warrt de Kastens nu egolweg överwacht. Achterna warrt se heilmakt.
Je länger de Dag duert, üm so fründlicher warrt he. Noch hebbt wi deels mastige Wulken, na’n Nahmeddag hen warrt de Wulken woll spiddeliger un de Sünn kruupt beten beter dörch, man enkelte Schuer kaamt liekers noch rünner. De Temperatur kladder bet achteihn Graad. Opstunns hebbt wi in Neewiendool twölf Graad. De Wind dorto kümmt meist middeldull mit pustige Böen ut Westen. Un so geiht dat wieder: Ok morgen dörchwussen Mangkaaktwedder – veel Wulken, beten Sünn, jümmer wedder Regenschuer, ok mit Blitz un Dunner vermengeleert. De Temperatur achteihn bet negenteihn Graad.
In Frankfoort, Stuttgart un Koblenz sünd de Perzessen al in Gang un af vundaag nu steiht denn ok in Hamborg en mootmaatlichen Rieksbörger vör’t Brett. De Anklaag smitt den sössunsösstig Johr olen Keerl ut’n Kreis Segebarg vör, dat he en terroristische Verenigen un den Plaan, allens ümtostöten, Stütt geven harr. So wullen se denn, dat vun’e Staatsform her wedder allens so warrn dee, so as dat dat Düütsche Riek in dat 19. Johrhunnert ween is. Bi dat Gerichtsverfohren passt se de ganze Tiet dull wat bi op, dat dor nix bi passeren deit. Losgahn deit dat vör dat böverste Lannsgericht hüüt Vörmiddag.
